Qazaqstandyq bankterge 47 mıllıon teńge aıyppul salyndy

NUR-SULTAN. QazAqparat – Eldegi segiz bankke ákimshilik aıyppuldar salyndy, dep habarlaıdy QazAqparat finprom.kz saıtyna silteme jasap.

Bıylǵy jyldyń mamyr aıynyń sońyndaǵy málimet boıynsha QR bank sektorynda 27 ekinshi deńgeıli bank boldy, olardyń 14-i sheteldikterdiń qatysýmen jumys isteıdi. Qazaqstan Respýblıkasynyń ekinshi deńgeıli bankteriniń jıyntyq aktıvteri jylyna 13% -ǵa artyp, 28,2 trln teńgeni qurady.

Bul rette, aktıvterdiń jáne basqa da kóptegen qarjylyq kórsetkishterdiń ósýine qaramastan, osy jyldyń birinshi jartyjyldyǵynda bankterge qatysty qarjylyq qyzmetterdi tutynýshylardyń quqyqtaryn qorǵaý aıasynda 87 yqpal etý sharalary qoldanyldy. Olardyń ishinde ákimshilik aıyppuldar, qadaǵalaýdyń usynymdyq sharalary, jazbasha uıǵarymdar bar.

Bankter kóp jaǵdaıda Qazaqstan Respýblıkasynyń bank zańnamasynda, sondaı-aq Qazaqstan Ulttyq Bankiniń normatıvtik quqyqtyq aktilerinde belgilengen normalardy saqtamaıdy:

- banktik qaryzdarǵa qyzmet kórsetý;

- tólemder men aqsha aýdarymdary;

- banktik shottarǵa qyzmet kórsetý.

Qazaqstan Respýblıkasynyń ekinshi deńgeıli 8 bankine tikeleı ákimshilik aıyppul salyndy. Bankterge salynǵan ákimshilik aıyppuldardyń jalpy somasy 2020 jyldyń birinshi jartyjyldyǵynda 47,6 mln. teńgeni qurady.

Ákimshilik jaýapkershilik qarastyrylǵan bankter jasaǵan negizgi zańbuzýshylyqtar:

- «Tólemder jáne tólem júıeleri týraly» Qazaqstan Respýblıkasynyń Zańynda belgilengen tólemder jáne (nemese) aqsha aýdarymdary boıynsha nusqaýlyqtardy oryndaý merzimderin buzý;

- Qarjy monıtorıngi sýbektileriniń Qazaqstan Respýblıkasynyń qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly zańnamasyn qarjy monıtorıngine jatatyn operatsııalar týraly aqparatty qujattyq tirkeý, saqtaý jáne usyný bóliginde zań buzý;

- basqa da zańbuzýshylyqtar.

Ákimshilik aıyppuldyń eń kóp mólsheri AzııaKredıt bankine salyndy. Oǵan barlyǵy 21,9 mln teńge aıyppul salynǵan. Sondaı-aq, Reseıdiń Sberbanki (11,1 mln. teńge) jáne Capital Bank Kazakhstan (7,8 mln. teńge) antıkóshbasshylar qatarynda. Tengri Bankke 4,2 mıllıon teńge, Alfa-Bankke 1,1 mıllıon teńge aıyppul salyndy.