Qazaqstandyq bankter jarty jylda 355 mlrd teńge taza paıda tapqan

NUR-SULTAN. QazAqparat – Bıyl jarty jylda bankterdiń taza paıdasy 300 mlrd teńgeden asty. Bul týraly QR Qarjy naryǵyn retteý jáne damytý agenttiginen málim boldy, dep habarlaıdy QazAqparat tilshisi.

«2022 jylǵy 1 shildedegi jaǵdaı boıynsha bank sektorynyń jetkilikti kapıtal qory bar. Negizgi kapıtaldyń jetkiliktilik koeffıtsıenti (k1) – 16,4 paıyz, menshikti kapıtaldyń jetkiliktilik koeffıtsıenti (k2) – 19,8 paıyz boldy. Bul júıe boıynsha ortasha alǵanda zańnamada belgilengen normatıvterden edáýir asady», - delingen agenttik málimetinde.

2022 jylǵy qańtar-maýsymda bankterdiń taza paıdasy 355 mlrd teńgeni qurady. Bul kórsetkish 2021 jylǵy osy kezeńimen salystyrǵanda 46,2 paıyzǵa tómen.

«Bank aktıvteriniń rentabeldiligi (ROA) 2022 jylǵy 1 shildede 2,7 paıyzdy (2021 jylǵy 1 shildede – 3,2%), kapıtaldyń rentabeldiligi (ROE) 21,9 paıyzdy (2021 jylǵy 1 shildede – 25,9%) qurady», - dep atalyp ótken habarlamada.

Budan buryn habarlanǵandaı, 2022 jylǵy 1 shildedegi jaǵdaı boıynsha Qazaqstan Respýblıkasynyń bank sektorynda 22 ekinshi deńgeıdegi bank bar.