Qazaqstandyq balýan erkin kúresten álem kýboginiń qola júldegeri atandy

ASTANA. QazAqparat – Qazaqstandyq balýan Azamat Dáýletbekov AQSh-tyń Aıova shtatyndaǵy Koralvıll qalasynda erkin kúresten ótken álem kýbogi jarysynda qola júldeger atandy, dep habarlaıdy QazAqparat tilshisi.

«Sportty damytý dırektsııasy» RMQK-dan málim etkenindeı, Azamat 86 kelige deıingi salmaqta álem quramasy sapynda kilemge shyqty.

Álem quramasy básekeni ekinshi aınalymnan bastady. Onda A.Dáýletbekov japonııalyq Tatsýııa Shıraıdy 9:1 esebimen tize búktirdi. Degenmen jartylaı fınalda ırandyq Álıreza Muhammed Karımımachıanıge jol berdi.

Azamat qola júlde úshin beldesýde grýzııalyq Sandro Amınashvılıdi 8:2 esebimen utyp, úzdik úshtikke ilikti.

Eske sala keteıik, budan buryn ústel tennısinen Alan Qurmanǵalıevtiń álem chempıonatynda altynǵa qosa qola medal jeńip alǵanyn jazǵan bolatynbyz.

Foto: www.instagram.com/drs_kz