Qazaqstandyq baqylaýshylar Qyrǵyzstandaǵy saılaýda barynsha ádildik tanytady

ASTANA. QazAqparat - Qazaqstandyq baqylaýshylar Qyrǵyz Respýblıkasyndaǵy prezıdenttik saılaýda barynsha ádil baqylaý júrgizedi. Bul týraly Ortalyq saılaý komıssııasynyń múshesi Marat Sársembaev málim etti, dep habarlaıdy «QazAqparat» HAA tilshisi.

Ortalyq saılaý komıssııasynyń otyrysynda Qyrǵyz Respýblıkasynyń Prezıdenti Almazbek Atambaevtyń Qazaqstannyń Qyrǵyzstandaǵy saılaýǵa aralasqany týraly shyndyqqa saı kelmeıtin málimdemesine sáıkes, ol eldegi saılaýǵa baqylaý júrgizý jumysynan bas tartý týraly qaýly shyqty.

«Biz ol jaqqa attanǵan ózimizdiń áriptesterimizge barynsha ádil bolýyn aıttyq. Qaı tarapqa bolmasyn eshqandaı baǵa berýge bolmaıtynyn da. Qalaı ótti solaı bolýy kerek. Basqa eshqandaı nusqa bolmaýy tıis. Sondyqtan, eger halyqaralyq uıymdar, naqty baqylaýshylar búkil protsesti Konstıtýtsııaǵa jáne qyrǵyzstandyq saılaý zańnamasyna sáıkes oıdaǵydaı ótti dep baǵa berse, onda eshqandaı másele bolmaýy kerek», - deıdi Marat Sársenbaev.

Onyń aıtýynsha, Qazaqstannan baqylaýshy jeke sýbekt retinde Qyrǵyzstandaǵy saılaýǵa qatyspaıtyndyǵyna qaramastan, 46 qazaqstandyq baqylaýshy TMD, DIAQB/EQYU, ShYU, TMYU mıssııalarynyń quramynda, sondaı-aq TMD, EQYU, túrkitildes memleketterdiń parlamenttik assambleıalarynyń tarapynan baqylaý júrgizetin bolady.

M.Sársembaev óz sózinde Qazaqstan tarapyna aıtylǵan shyndyqqa saı kelmeıtin málimdemege bola Qazaqstan men Qyrǵyzstannyń arasy buzylmaıtynyna, eki eldiń baılanysy dostyq turǵysynda kúsheıe beretinine senim bildirdi.