Qazaqstandyq BAQ-ty damytýdy kózdeıtin Aqparattyq doktrına bekitilmek

ASTANA. QazAqparat – Qazaqstannyń Aqparattyq doktrınasy bekitilýi múmkin. Úkimet «Ashyq» NQA portalynda Prezıdent Jarlyǵynyń jobasyn jarııalady, dep habarlaıdy QazAqparat tilshisi.

Aqparattyq doktrına otandyq aqparattyq salany damytý jónindegi kózqarastar men qaǵıdattar júıesin, onyń ashyqtyǵy men básekege qabilettiligin arttyrý tetikterin aıqyndamaq. Sonymen qatar, qoǵamnyń múddelerine jaýap beretin jáne memlekettiń odan ári damýyna yqpal etetin ıdeıalyq qundylyqtyqtardy bekitedi.

Qujatta kórsetilgendeı, doktrına aqparattyq-kommýnıkatsııalyq salada memlekettik saıasatty qalyptastyrýda jáne qoǵamdyq qatynastardy damytýda negizgi qujat bolady.

«Doktrınanyń - maqsaty otandyq aqparattyq salany damytý úshin jaǵdaı jasaý jáne QR aqparattyq egemendigin qamtamasyz etý sharalaryn ázirleý. Sonymen qatar, ol medıalyq protsestiń barlyq sýbektisine teń jaǵdaı jasaýǵa jáne olardyń quqyqtaryn iske asyrýǵa, sóz bostandyǵyn qamtamasyz etýge, konstıtýtsııalyq quqyqtardyń saqtalýyn eskere otyryp, zańmen tyıym salynbaǵan kez kelgen tásilmen aqparat alýǵa jáne ony taratýǵa, sondaı-aq aqparattyq protseske qatysýshynyń arasynda senim deńgeıin arttyrýǵa baǵyttalǵan. Doktrınanyń negizgi baǵyty - aqparattyq qaýipsizdikti qamtamasyz etý men syrtqy syn-qaterlerge, táýekelderge ýaqtyly den qoıýdy kózdeıdi», - dep jazylǵan Úkimet qaýlysynda.

Qujatqa sáıkes, otandyq BAQ-ta sapaly kontentti qalyptastyrý men oǵan suranysty arttyrý mańyzdy. Sondaı-aq, sheteldik aqparattyq ónimderge táýeldilikti azaıtýǵa den qoıý qajet. Ol úshin mynadaı sharalar usynylady:

- jalǵan aqparatqa qarsy is-qımyl jónindegi tetikti kúsheıtý jáne syrtqy aqparattyq qaterlerdi nıvelırleý;

- halyqtyń synı oılaýyn qalyptastyra otyryp, taldamaly mazmuny bar kontentti damytý qajet;

- memlekettik organdardyń kommýnıkatıvtik saıasatynyń modelin jetildirý. Barlyq memlekettik menedjerdi, baspasóz qyzmetkerleriniń jáne qoǵammen baılanys bólimi mamandarynyń biliktiligin úzdiksiz arttyrý;

- memleket ıeligindegi aqparatqa qoljetimdilikti qamtamasyz etý;

- otandyq aqparattyq ónim óndirýshilerdiń syrtqy naryqqa shyǵýyn yntalandyrý.

Aqparat jáne qoǵamdyq damý mınıstrliginiń deregine saı, doktrınany iske asyrý jalǵan aqparatqa qarsy is-qımyldyń memlekettik tetigin jetildirýge, strategııalyq kommýnıkatsııalardyń tıimdi júıesin qurýǵa jáne qazaq mádenıetiniń jan-jaqty damýy men Qazaqstandaǵy azamattyq biregeılikti nyǵaıtýdy qamtamasyz etýge múmkindik beredi.

Qujatty ashyq talqylaý 29 jeltoqsanǵa deıin jalǵasady. Keıin túpkilikti bekitý úshin Memleket basyshysyna qol qoıýǵa joldanady.