Qazaqstandyq áýe kompanııalary avıareısteriniń 8 aıdaǵy kórsetkishteri

ALMATY. 9 qyrkúıek. QazAqparat. Ótken 8 aıda elimizdegi áýe reısteriniń 68%-yn «Eır Astana» jáne 25%-yn «SCAT» áýekompanııasy atqardy. Bul týraly QR Kólik jáne komýnıkatsııa mınıstrliginiń baspasóz qyzmeti habarlady.

«Eır Astana» AQ-y 8 aıda barlyǵy 21033 reıs jasaǵan. Onyń 17364 reısi keste boıynsha, 3669 reıs kidirispen oryndalǵan. Ushý júıeliliginiń deńgeıi 82,6% qurady. Ótken jyly osy merzimde 18 128 reıs, onyń ishinde 14 496 reıs keste boıynsha, 3632 reıs kidirispen oryndaldy, ıaǵnı ushý júıeliligi 79,9% quraǵan bolatyn.

«SCAT» AQ-y 8 aıda barlyǵy 7 938 reıs júzege asyryp, onyń 7541 reısin kestemen, 397 reısti kidirispen oryndaǵan. Osylaısha, ushý júıeliligi 95% qurady. Ótken jyly osy merzimde 7 425 reıs jasap, onyń ishinde 7 038 reısti kestemen, 387 reıs kidirispen oryndaǵan edi. Ushý júıeliligi 94,8% quraǵan bolatyn.

Óńirlik áýe kompanııalary boıynsha «Ertis Eır» áýekompanııasy» AQ - 8 aıda ushý reısteriniń júıeliligin 98,5%-ǵa oryndaǵan. (418 reıs oryndaldy, kidiris bolǵan joq). Al «Avıakompanııa «Jezqazǵan Eır» AQ -daǵy ushý júıeliligi 8 aıda 97,6% (302 reıs oryndaldy), «Semeıavıa» AQ - 95% (784 reıs oryndaldy) jáne «Jetisý» áýekompanııasy» AQ - 92,8%-ǵa (293 reıs oryndaldy) oryndalǵan.