Qazaqstandyq áskerıler Máskeýdegi sherýge qatysa ma – mınıstrlik jaýaby
«Joq. Bıyl qazaqstandyq áskerı qyzmetshilerdiń Qyzyl alańdaǵy sherýge qatysýy o basta josparlanbaǵan. Ekinshi dúnıejúzilik soǵystaǵy Jeńistiń 75 jyldyǵyn atap ótý kezinde bizdiń áskerı qyzmetshiler barǵan edi», - dep jaýap berdi QR Qorǵanys mınıstrligi Tárbıe jáne ıdeologııalyq jumystar departamentiniń ókili, polkovnık Vıtalıı Adamovıch onlaın-brıfıng barysynda.
Buǵan deıin reseılik BAQ Máskeýde Jeńis sherýine daıyndyq bolatynyn, jalpy daıyndyq 7 mamyrǵa josparlanǵanyn jazǵan edi.
Spıker qazaqstandyq áskerı qyzmetshilerdiń ardagerlerdi qalaı quttyqtaıtynyn aıtty.
«Ótken jylǵy sekildi bizde quttyqtaýdyń jaqsy tájirıbesi bar. Ártister men shyǵarmashylyq ujymdar ardagerler turatyn jerge barady jáne ardagerlerge arnalǵan soǵys jyldaryndaǵy ánder oryndalady. Muny tek ardagerler ǵana emes, búkil aýdan, shaǵynaýdan turǵyndary da tamashalap, birge quttyqtaıdy. Odan bólek, jyl saıyn ádettegideı «Jas sarbaz» qozǵalysy da tartylady. Bizdiń jas patrıottar da birqatar shara ótkizedi. Keıbir óńirlerde áskerı orkestrler áskerı bólimder ornalasqan eldi mekenderdiń kóshelerimen ótip, soǵys jyldaryndaǵy ánderdi oryndaıdy», - deıdi V. Adamovıch.