Qazaqstandyq áskerıler qoıan-qoltyq urystan álem chempıonatyna qatysady

NUR-SULTAN. QazAqparat - Sankt-Peterbýrgte «M-1 Arena» kópsalaly sporttyq oıyn-saýyq kesheninde erler men áıelder arasynda qoıan-qoltyq urystan álem chempıonaty ótedi. Oǵan Armııa ortalyq sport klýby sportshylary qatysady, dep habarlaıdy QazAqparat QR Qorǵanys mınıstrligine silteme jasap.

Jarys mereıtoı qurmetine uıymdastyrylyp otyr. Qoıan-qoltyq urystan álem chempıonaty besinshi ret ótedi. Týrnırge 40 elden 200-den astam myqty sportshy qatyspaq.

Olardyń arasynda qoıan-qoltyq urystan sport sheberleri, álem jáne Eýropa chempıondary, kásipqoılar arasynda týrnırlerdiń tanymal sport sheberleri (UFC) bar.

Qazaqstannyń Qarýly Kúshterinen bul jarysqa 2017 jylǵy áskerıler arasynda ótken halyqaralyq sanattaǵy qoıan-qoltyq urys sheberi, álem chempıony, aǵa leıtenant Saǵyn Qazybek (55 kg), 2018 jylǵy álem chempıony Tursyn Aıan (50 kg), 2017 jylǵy álem chempıonatynyń júldegeri Sora Rahmonova (70 kg), 2017 jylǵy álem chempıonatynyń júldegeri Regına Maksımova (75 kg) qatysady.