Qazaqstandyq áskerıler «Beıbit mıssııa» oqý-jattyǵýyna qatysady
13:28, 13 Qyrkúıek 2021
NUR-SULTAN. QazAqparat - Shanhaı yntymaqtastyq uıymyna múshe memleketter – Úndistan, Qazaqstan, Qytaı, Qyrǵyzstan, Pákistan, Reseı, Tájikstan, Ózbekstan áskerı kontıngentteri terrorızmge qarsy birlesken «Beıbit mıssııa – 2021» komandalyq-shtabtyq oqý-jattyǵýyna qatysady, dep habarlaıdy QazAqparat tilshisi.
QR Qorǵanys mınıstrliginiń málimetinshe, bul oqý-jattyǵý Reseı Federatsııasynyń Orynbor oblysynda ótedi.
Oǵan Qazaqstan Qarýly Kúshterinen «Batys» óńirlik qolbasshylyǵynyń jeke quramy, áskerı-áýe kúshteriniń Sý-25 ushaqtary qatysady.
Oqý-jattyǵý aıasynda ShYU-ǵa múshe elderdiń áskerı kontıngentteri terrorızmge qarsy birlesken operatsııaǵa daıyndalý jáne ony ótkizý máselelerin pysyqtaıdy.
Bul «Beıbit mıssııa» 2007 jylǵy 27 maýsymdaǵy Shanhaı yntymaqtastyq uıymyna múshe memleketter arasyndaǵy birlesken áskerı oqý-jattyǵý ótkizý týraly kelisim aıasynda 2 jylda bir ret ótkiziledi.