Qazaqstandyq áskerı qyzmetshiler UQShU elderiniń desantshylarymen birlesken arnaıy operatsııalar ótkizdi (FOTO)
Qorǵanys mınıstrligi baspasóz qyzmetiniń haabarlaýynsha, onyń quramynda QR QK áskerı qyzmetshileri de bar. UQShU JDUK arnaıy maqsattaǵy bólimsheleriniń praktıkalyq jarysyn ótkizý aıasynda qarý men esirtki zattaryn alyp ótip bara jatqan topty izdeý baǵytyn anyqtaý jáne qolǵa túsirý is-qımylyn júrgizý boıynsha birlesken is-qımyl pysyqtaldy. Qarsylas jasaıtyn is-qımyldyń jaǵdaıy men sıpaty, onyń quramy týraly naqty málimet alǵannan keıin UQShU JDUK qolbasshysy bólimshe komandırlerine UQShU bólimsheleriniń jaýapty aýdandaryndaǵy dıversııalyq-barlaý jasaqtary men bandquralymdaryn qamaý jáne joıý jóninde tapsyrmalar berdi. UQShK múshe alty eldiń desantshylary birlesip zańsyz qarýly quralymdardy shartty basyp alý, bazasyn joıý jáne tutqyndardy bosatý boıynsha arnaıy operatsııalardy júrgizdi. Birlesken operatsııalar barysynda Reseı jáne Belarýs elderiniń barlaýshylary berilgen aýmaqqa desant retinde túsirilip, Qyrǵyzstan men Tájikstannyń taktıkalyq desanty oq atýdy qoldaý kezinde tikushaqpen berilgen aımaqqa jetkizildi, Qazaqstannyń ÁÁK bólimsheleri Reseı TJM birge tótenshe jaǵdaılardyń saldaryn joıý máselesin pysyqtady. Birlesken oqý-jattyǵýǵa jeke quramnan barlyǵy 2000-ǵa jýyq adam, 200 birlik áskerı tehnıka jáne 40 ushaq pen tikushaq tartyldy.