Qazaqstandyq áskerı qyzmetshiler Armııa oıyndarynda eki konkýrstyń jeńimpazy atandy
Ushqyshsyz ushý apparattarynyń eseptoptary arasyndaǵy «Suńqar ańshylyǵy» konkýrsynda Qazaqstan komandasy bultaryssyz jeńiske jetti. Ekinshi oryndy – Belarýs, úshinshi oryndy – Reseı enshiledi.
«Artıllerııadan oq atý sheberleri» – bul mınaatqysh bólimshelerdiń jarysy. Qazaqstan jaýyngerleri tabandy kúreste negizgi qarsylasy – reseılik áskerı qyzmetshilerden basyp ozyp birinshi oryn aldy. Úshinshi oryn Ázerbaıjanǵa buıyrdy.
Budan ózge, el Qarýly Kúshteriniń áskerı qyzmetshileri birqatar saıystardan júldeli oryndar aldy. Aıta ketsek, «Desant vzvody» konkýrsynda reseılik desantshylarǵa ǵana ese jiberip, ekinshi orynǵa taban tiredi.
Qazaqstan sondaı-aq, «Taktıkalyq mergen», «Attar marafony», «Beıbitshilik jaýyngeri», «Tártip saqshysy», «Elbrýs sheńberi», «Teńiz kýbogy» jáne «Armııa mádenıeti» konkýrstarynda «qola» júlde ıegeri atandy.
Armııa halyqaralyq oıyndaryna qatysýshy áskerı qyzmetshiler Otannan jyraqta júrse de, Jambyl oblysynda oryn alǵan órt kezinde búkil elmen birge qaıǵyrǵanyn birneshe ret atap ótti. Armııa oıyndaryndaǵy ózderiniń joǵary jetistikterin qaza tapqandardyń rýhyna arnaıdy.
Armııa halyqaralyq oıyndarynyń jabylý rásimi kúni «Tank bıatlony» konkýrsynyń aqtyq saıysy ótedi. Onda Ázerbaıjannyń, Qazaqstannyń, Qytaı jáne Reseıdiń tank ekıpajdary baǵyn synaıdy.