Qazaqstandyq ártister Berlınniń bas sahnasynda óner kórsetedi
Sheteldik kórermender qazaqstandyq mýzykanttardyń oryndaýynda skrıpka, vıolonchel jáne orkestrmen fortepıanoǵa arnalǵan Bethovenniń kontsertin tyńdaı alady.
Bul halyqaralyq deńgeıdegi kontserttiń basty ereksheligi – otandyq ártister álemdik klassıkalyq mýzykanyń brendine aınalǵan Berlın sımfonııalyq orkestrimen birlesip óner kórsetedi. 73 jyl buryn qurylǵan áıgili orkestrmen birlesken kontsert ótkizý – árbir kásibı mýzykalyq ujym úshin úlken mártebe.
«FORTE TRIO» - belgili pıanıst, Qazaqstannyń eńbek sińirgen qaıratkeri Tımýr Ýrmancheevtiń bastamasymen qurylǵan erekshe ansambl. Budan buryn fortepıano, skrıpka men vıolonchel aspaptary úılesim tapqan mýzykalyq ujymdar elimizde bolmaǵan. Joǵary kásibı sheberliginiń arqasynda «FORTE TRIO» Qazaqstan mádenıetin halyqaralyq deńgeıde nasıhattaıtyn úzdik kameralyq ansamblge aınaldy. Parıj, Rım jáne Berlın syndy álemdik mádenıet ortalyqtarymen qatar trıonyń gastroldik kartasynda Antıgýa men Barbýda sııaqty ekzotıkalyq memleket bar. Ótken jyldyń jeltoqsan aıynda Qazaqstan Táýelsizdiginiń 30 jyldyǵyna oraı trıo Frantsııanyń 4 iri qalasynda kontsert ótkizip, osy eldiń 2021 jylǵy kontserttik maýsymyn aıaqtady.
Pandemııalyq shekteýler jaǵdaıynda, sondaı-aq qańtardaǵy oqıǵalardyń saldarynan álemdik qaýymdastyq elimizdi saıası kataklızmder arenasy retinde qabyldanǵan kezeńde trıo óz ónerleri arqyly Eýrazııalyq keńistiktiń kóshbasshysy bolyp Qazaqstan mádenıetiniń joǵary dárejesin kórsetýge umtylady.