Qazaqstandyq alǵashqy konteınerlik poıyz túriktiń Mersın qalasyna jetti
Konteınerlik poıyz quramynda «QTJ» UK» AQ-ǵa qarasty otyz 20 fýttyq konteınerlerge qapshyqtalǵan astyq pen «ÁTJ» JAQ vagondaryna tıelgen júkter bar. Jyljymaly quram 5435 shaqyrymdy on kúnde basyp ótti. Halyqaralyq baǵdar Quryq porty parom kesheni men Kaspıı teńizi jaǵalaýyndaǵy Alıat porty arqyly ótti. Sapar barysynda vagondardy keń tabandy relsten tar tabandy túrine almastyrý jańa grýzın-túrik shekaralyq beketi Ahalkalakı- Karsta jasaldy.
«Jobany tabysty júzege asyrý barlyq múddeli taraptardyń birlesken qyzmetiniń arqasynda múmkin boldy. Onyń ishinde temirjol, port, teńiz kóligi ákimshiligi, logıstıkalyq kompanııalar - Transkaspıı halyqaralyq kólik baǵdaryna (THKB) qatysýshy memleketterdiń kólik qrylymdary belsendilik kórsetti», - deıdi «KTZ Express» AQ konteınerlik tasymaldaý departamentiniń dırektory Almat Kárimov.
A. Kárimovtiń aıtýynsha, Baký-Tbılısı-Kars konteınerlik poıyzyn túrik portyna jetkizýmen «QTJ» UK» AQ fılıaly - «KTZ Express» AQ enshiles kompanııasy aınalysty. THKB baǵdaryndaǵy taýar tasymaldaýdyń tıimdi logıstıkalyq tizbegin jasaqtaý jáne konteınerlik júk aǵynyn tartý men júk bazasy balansyn jasaqtaý maqsatynda «KTZ Express» AQ júk jóneltýshilerge mýltımodaldyq konteınerlik poıyz jasaqtaýda avtokólik qyzmeti men qazaqstandyq kólik-logıstıkalyq ınfraqurylymyn paıdalaný usynyldy.
«Bul baǵdardyń jyldyq áleýeti 10 mıllıon tonna júk tasymaldaýǵa jetedi dep baǵalanyp otyr. Taıaý arada kelesi júk kezegi jóneltiledi», - deıdi A. Kárimov.
Qazaqstanǵa óziniń menshigindegi termınaldyq ınfraqurylymdy paıdalanyp, mýltımodaldyq sheshimderdi qoldanýy Túrkııa baǵdaryna astyq jóneltý ǵana emes, basqa da taıaý jáne alys kórshilerge qajetti júk tasymaldaýǵa keń jol ashady.