Qazaqstandyq agrarshylar SIMMIT ǵalymdarymen birlesip, bıdaıdyń jańa sorttaryn shyǵarmaq
Memorandýmnyń maqsaty - agrarlyq ǵylym men aýyl sharýashylyǵy óndirisin órkendetý, ósimdikterdiń túsimdiligin jáne topyraqtyń qunarlylyǵyn arttyrý, ósimdikterdiń genetıkalyq resýrstaryn baıytyp saqtaý, qorshaǵan ortany qorǵaý, kadrlar daıarlaýdy jaqsarta túsý, halyqaralyq yntymaqtastyqty jáne ınnovatsııalyq-tehnologııalyq damytýdy kúsheıtý.
Memorandým Qazaqstandaǵy qoldanbaly zertteýlerdiń básekege qabilettiligin arttyrýǵa jáne azyq-túlik qaýipsizdigin qamtamasyz etýge yqpalyn tıgizbek.
«AÓK salasyndaǵy qoldanbaly ǵylymı zertteýler» atty nysanaly baǵdarlama sheńberinde «Aýyl sharýashylyǵy ósimdikteriniń genetıkalyq áleýetin arttyrý jáne QR ártúrli agroekologııalyq aımaqtaryna arnalǵan agrotehnologııalardy jetildirý» basym baǵyty boıynsha qazaqstandyq ǵalymdardyń SIMMIT-pen birlesip júrgizetin zertteýleriniń kólemi 2013 jyly 30 mln. teńgege jetpek jáne odan ári de bul kólem keńeıtile beretin bolady. «Meksıka-Qazaqstan bıdaı selektsııasy» jáne «Bıdaıdy jaqsartý jónindegi Qazaqstan-Sibir jelisi (QAZSІBІR)» baǵdarlamalary osy joba sheńberinde iske asyryla bastady. Bıdaıdyń jańa sorttaryn shyǵaryp, kóbeıtý jáne synaqtan ótkizý úshin SIMMIT «QazAgroInnovatsııa» aktsıonerlik qoǵamynyń ǵylymı mekemelerine bıdaıdyń selektsııalyq materıaldaryn beredi. Olardyń qatysýymen sharýashylyq jáne bıologııalyq turǵydan bıdaıdy asa qundy 37 sıpaty boıynsha zerdeleý úshin QAZSІBІR bıdaı kóshettikteri jasalyp, Kenııada qazaqstandyq sorttardyń bıdaı sabaǵyndaǵy tattaný aýrýyna tózimdiligi boıynsha baǵa berildi.
«QazAgroInnovatsııa» aktsıonerlik qoǵamy SIMMIT-pen ózara yntymaqtastyqty odan ári damyta túsýge meılinshe yntaly bolyp otyr. Búgingi tańda Halyqaralyq júgeri men bıdaıdy jaqsartý ortalyǵy álemniń 100-den astam elderindegi áriptesterimen birlesip, azyq-túliktik qaýipsizdikti jaqsartý, bıdaı men júgeriniń túsimdiligi men paıdalylyǵyn arttyrý úshin ǵylymnyń ártúrli salalarynda jumys isteýde. Bilikti mamandar daıarlaý, álemdik tájirıbe jetistikterin, aýyl sharýashylyǵy daqyldarynyń asa baı gen qoryn, olardy jaqsartýdyń qazirgi zamanǵa laıyq ádisterin, eń ozyq tehnologııalardy elimizde engizý mindetterin atqara otyryp, SIMMIT álemdik ǵylymı júıege Qazaqstannyń yqpaldasýyna óz kómegin tıgizetin bolady.