Qazaqstandyq advokatýra salasyna Probono tájirıbesi engiziledi

ASTANA. QazAqparat - Elimizde jańadan ázirlenip jatqan «Advokattyq qyzmet jáne zań kómegi týraly» zań jobasyna Probono tájirıbesi engizilip otyr. Tyń tájirıbe halyqtyń áleýmettik turǵydan osal toptaryna tegin zań kómegin kórsetýge baǵyttalǵan, dep habarlaıdy «QazAqparat» HAA tilshisi.

Qazaqstandyq advokatýra salasyna engizilgeli jatqan tyń tájirıbe týraly Ortalyq kommýnıkatsııalar qyzmetinde ótken baspasóz máslıhatynda QR Ádilet mınıstrligi Tirkeý qyzmeti jáne zań qyzmetin uıymdastyrý departamentiniń dırektory Baqtygúl Ataǵazıeva aıtyp berdi.

«Probono tájirıbesi arqyly halyqtyń áleýmettik turǵydan osal toptaryna tegin zań kómegi kórsetilmek. Osal toptarǵa tegin zań kómegin kórsetetin advokattar úshin yntalandyrý tetikteri ázirlenetin bolady. Atalǵan ınstıtýt halyqaralyq tájirıbelerdi negizge ala otyryp ázirlengen. Sonymen qatar, azamattar úshin Probono júıesiniń mindetti emes ekenin atap ótkim keledi. Demek, zań kómegine muqtaj adamnyń Probono qyzmetin qabyldaýy nemese qabyldamaýy óz erkinde», - deıdi Baqtygúl Ataǵazıeva.

Sonymen qatar, departament dırektory jalpy zań jobasynyń mańyzy týraly sóz qozǵady.

«Zań jobasy qoldanystaǵy rásimderdiń ashyqtyǵyn, shynaıylyǵy men eń bastysy, zań kómeginiń sapasyn arttyrýdy qamtamasyz etýge baǵyttalǵan budan da basqa usynystardy qamtıdy. Jalpy jobanyń  qabyldanýy halyqqa bilikti mamandar men qoljetimdi ári sapaly zań qyzmetin kórsetýdi qamtamasyz etedi», - deıdi ol.