Qazaqstandyq 11 jasar ánshi «Golos. Detı» jobasynda 3-oryn ıelendi

NUR-SULTAN. QazAqparat – Jerlesimiz Saǵyn Ómirbaıuly reseılik «Golos. Detı» telejobasynda júldeli úshinshi orynǵa ıe boldy, dep habarlaıdy QazAqparat tilshisi.

Saǵyn Ómirbaıuly — Shymkent qalasynyń týmasy.

Atalǵan án saıysynyń sýperfınalyna 3 úmitker shyǵyp, ózara baq synasty.

Jerlesimiz Saǵyn Ómirbaıuly sýperfınalda «Edınstvennaıa moıa» ánin oryndady.

Aqtyq saıysta daýys berý nátıjesinde 40,6 paıyzben 8 jasar Adelııa Zagrebına «Golos. Detı» jobasynyń jeńimpazy atandy.

Ekinshi oryndy 32,2 paıyz daýyspen 12 jasar Sofııa Olaresko ıelendi.

Otandasymyz 11 jasar Saıyn Ómirbaıuly 27,2 paıyz daýys jınap júldeli úshinshi orynǵa turaqtady.

Jas ánshi sahna tórinde qoldaý bildirgen barsha jurtqa alǵysyn aıtyp, tálimgeri, belgili reseılik ánshi Polına Gagarınaǵa dombyrany syıǵa tartty.

Eske sala ketsek, buǵan deıin atalǵan teleshoýǵa oraldyq jas ánshi Erjan Maksım qatysty .

Sondaı-aq, almatylyq Danelııa Tóleshova «Golos. Detı» jobasynyń Ýkraınadaǵy nusqasyna qatysyp, jeńimpaz atandy .