Qazaqstandy ózgeristerdiń jańa tolqyny kútip tur - saıasattanýshy
Soǵan oraı, Qazaqstan úshin bul qandaı ózgerister men jańashyldyqtar ákeletindigi týrasynda QazAqparat agenttiginiń Bakýdegi menshikti tilshisine bergen suhbatynda saıasattanýshy, jýrnalıst, Bakýdiń Halyqaralyq mýltımádenıettilik ortalyǵynyń sarapshysy Tofık Abbasov aıtyp berdi.
«Qazaqstan Prezıdenti usynǵan bastamalar bir aqıqattyń betin ashyp otyr, bılik qoǵamdy demokratııalandyrý jáne memlekettik basqarý júıesin ońtaılandyrýǵa kelgen kezde, jaǵdaıdyń asqynýy men shıelenisýin kútpeı, ol protsesterdiń aldyn alýy qajet», - deıdi Tofık Abbasov.
Sarapshynyń sózinshe, memleket basshysy Prezıdenttiń edáýir quzyretin Úkimetke aýystyryp, Parlamentti budan da joǵary jaýapkershilikke bólý arqyly, bıliktiń atqarýshy organdary men halyq arasyndaǵy qashyqtyqty jaqyndatýda.
«Prezıdent óziniń bastamasy arqyly, shırek ǵasyrǵa sozylǵan eldiń táýelsizdiginde jaýapty kezeń ótkenin, endi halyq bıliginiń shyn áleýetin damytýǵa negizdelgen memleket ómirinde jańa dáýir bastalatynyn meńzep otyr», - dedi sarapshy.
Aıta keteıik, keshe QR Prezıdenti Nursultan Nazarbaev otandyq telearnalar arqyly bılik tarmaqtary arasynda ókilettikterdi bólý máseleleri jónindegi úndeýin jarııa etti. Onda Prezıdenttiń áleýmettik-ekonomıkalyq protsesterdi retteýdegi birshama ókiletterin Úkimetke jáne basqa da atqarýshy organdarǵa berý, Úkimetti jasaqtaýda Parlamenttiń rólin kúsheıtý qarastyrylǵan.
QR Prezıdenti búkilhalyqtyq talqylaýǵa shyǵarǵan Qazaqstan Respýblıkasynyń Konstıtýtsııasyna ózgeris engizýge qatysty usynystar 26 aqpanǵa deıin myna mekenjaı boıynsha qabyldanady: 010000, Astana qalasy, Esil aýdany, Úkimet úıi, Qazaqstan Respýblıkasy Prezıdenti Ákimshiliginiń Memlekettik quqyq bólimi, elektrondyq poshta- ap2017@akorda.kz