Qazaqstandyqtar Túrkııaǵa aqsha jiberýdi azaıta bastady

<p>ASTANA. KAZINFORM — QR Ulttyq bankiniń málimetinshe, bıyl sáýirde otandastarymyz halyqaralyq aqsha aýdarý júıesi arqyly Túrkııaǵa 12,6 mlrd teńge aýdarǵan.</p>

Bul — ótken jyldyń sáıkes kezeńimen salystyrǵanda 23%-ǵa az. Al, bıyl naýryzda kórsetkish 15%-ǵa qysqarǵan.

Ótken jyldaǵy kórsetkishterge kóz júgirtsek, bıyl ár aı saıyn aýdarylǵan qarajattyń azaıǵany baıqalady.

Sáıkesinshe, bıyl qańtar-sáýirdegi kórsetkish 2023 jyldyń sáıkes kezeńimen salystyrǵanda 20% tómendegen.

Saıyp kelgende bul quldyraý qazaqstandyqtardyń shetelge aqsha aýdarymynyń jalpy kólemine aıtarlyqtaı áser etti.

Bıyl sáýirde kórsetkish 65,9 mlrd teńgege jetip, jyldyq esep boıynsha 14%-ǵa tómendegen.

Bıylǵy 4 aıdaǵy aýdarymdardyń jalpy somasy — 236,5 mlrd teńge. 

Bul — 2023 jyldyń sáıkes kezeńimen salystyrǵanda 9%-ǵa az.

Aıtpaqshy, tek Túrkııaǵa ǵana aqsha aýdarymy azaıyp jatqan joq. Máselen, Ózbekstanǵa 4 aıda 47,7 mlrd teńge, (-8% j/j), Grýzııaǵa 19,8 mlrd teńge (28%-ǵa tómen) aýdarylǵan.

Kerisinshe, qańtar-sáýir aılarynyń nátıjelerine súıensek, Reseı Federatsııasyna aýdarylǵan qarajat kólemi ótken jyldyń sáıkes kezeńimen salystyrǵanda 15%-ǵa ósken.

Byltyr tórt aıda 69,2 mıllıard teńge aýdarylsa, bıyl kórsetkish 79,5 mıllıard teńgeni qurap otyr.