Qazaqstandyqtar Tesla aktsııalaryn jıi satyp ala bastady

<p>ASTANA. KAZINFORM &ndash; 2023 jyly qazaqstandyqtar Tesla kompanııasynyń aktsııalaryn jıi satyp ala bastady. Bul týraly KASE Qazaqstan qor bırjasynyń basshysy Alına Aldambergen baıandady.</p>

2023 jyly jeltoqsan aıynyń sońynda KASE Global sheteldik qaǵazdar sektorynda 45 ataý jáne 11 sheteldik emıtenttiń ETF aktsııalary bolǵan.

Ótken jyldyń qorytyndysy boıynsha KASE Global sektorynda saýda kólemi 36,5 mlrd teńgege jetken jáne 2022 jylmen salystyrǵanda 41,7%-ǵa nemese 10,8 mlrd teńgege ulǵaıǵan. Saýda-sattyqtyń ortasha táýliktik kólemi 148,6 mln teńgeni, mámilelerdiń ortasha táýliktik sany – 246 bolsa, bir mámileniń ortasha kólemi – 603,3 myń teńgeni quraǵan.

Qazaqstan qor bırjasynyń málimetinshe, 2023 jyly KASE Global sektoryndaǵy eń kóp mámileler mynadaı aktsııalarmen jasalǵan:

- Tesla (TSLA_KZ) – jalpy somasy 1 610,4 mln teńgege 6 714 mámile;
- Ford Motor Company (F_KZ) – 220,7 mln teńgege 6 017 mámile;
- Intel Corporation (INTC_KZ) – 1 108,9 mln teńgege 5 135 mámile.

Alına Aldambergenniń aıtýynsha, ınvestorlardyń negizgi sanattary arasynda brokerlik-dılerlik uıymdar úlesi – 36%, basqa ınstıtýtsıonaldyq ınvestorlar úlesi – 0,1%-dan az, basqa zańdy tulǵalar úlesi – 26,2%, jeke tulǵalar úlesi – 37,8%, rezıdent emesterdiń úlesi – 0,6% qurady.

Buǵan deıin Alına Aldambergen bırja naryǵynyń 2023 jylǵy jumysyn qorytyndylady.