Qazaqstandyqtar Seıshel araldaryna 30 kúnge vızasyz bara alady

<p>Syrtqy ister mınıstrliginiń resmı ókili Aıbek Smadııarov Qazaqstan men Seıshel Respýblıkasynyń arasynda 30 kúndik vızasyz rejım kúshine engenin málim etti, dep habarlaıdy <a href="https://www.inform.kz/" target="_blank" rel="noopener">Kazinform.</a></p>

«2023 jylǵy 22 qyrkúıekte Nıý-Iork qalasynda qol qoıylǵan QR Úkimeti men Seıshel Respýblıkasynyń Úkimeti arasyndaǵy vızalyq talaptardan ózara bosatý týraly kelisim 2024 jylǵy 6 qańtardan bastap kúshine endi. Kelisimniń birinshi baby boıynsha, eki eldiń azamattary ekinshi ýaǵdalasýshy tarap memleketiniń aýmaǵyna bir nemese birneshe ret kelý, ketý, tranzıt, ýaqytsha júrip-turý úshin vızalyq talaptardan bosatylady. Osy rette azamattardyń shekaradan ótken kezden bastap eki memleket aýmaǵynda bolý merzimi kúntizbelik 30 kúnnen aspaıtyn merzimdegi kezeńde, al kúntizbelik 180 kún ishinde jıyntyǵynda kúntizbelik 90 kúnnen aspaýy kerek», - dedi SІM resmı ókili. 

Onyń aıtýynsha, qazaqstandyqtar atalǵan aýmaqqa sapar jasamaı turyp, ol jaqta neshe kún bolatynyn naqty josparlap alýy kerek.

«Eger Qazaqstan azamattary Seıshel araldarynda 30 kúnnen astam ýaqytqa qalǵysy kelse, tıisti sanattaǵy Seıshel vızasyn aldyn ala resimdeýi kerek», - dedi Aıbek Smadııarov.