Qazaqstandyqtar ózin 10 jylǵa deıin qumar oıyndardan shekteı alady

<p>ASTANA. KAZINFORM &ndash; Buryn paıdalanýshylar qumar oıyndarǵa qatysýdy 6 aıdan 12 aıǵa deıin shekteýdi tańdaı alsa, endi bul merzimdi 10 jylǵa deıin uzartý múmkindigi paıda boldy, dep habarlaıdy Kazinform agenttigi Elektrondy úkimetke silteme jasap.</p>

Qazaqstandyqtar eGov Mobile qosymshasy arqyly ózderine qumar oıyndar men bás tigýge 10 jylǵa deıin tyıym sala alady. Bul qyzmet lıtsenzııalanǵan oıyn alańdary men býkmekerlik keńselerdiń onlaın-platformalaryna qoljetimdilikti shekteýge múmkindik beredi.

Qyzmet tek 21 jastan asqan tulǵalarǵa qoljetimdi.

Paıdalanýshy ótinish bergen soń qumar oıyndarǵa qatysýyna tyıym salynǵan tulǵalar tizimine avtomatty túrde engiziledi jáne ótinishti qaıtaryp alý múmkindigi bolmaıdy. Buǵan deıin shekteý engizgen azamattar shekteý merzimin uzarta alady.

Ótinishti qaıta bergen jaǵdaıda júıe paıdalanýshyny shekteýdiń qazirgi mártebesi týraly habardar etip, onyń merzimin uzartýdy usynady. Tolyq aqparat eGov.kz saıtynda jazylǵan.

Buǵan deıin Qazaqstanda qumar oıyn bıznesin retteıtin zańǵa ózgerister engizilgenin jazǵan edik. Jańashyldyqtardyń biri – memlekettik qyzmetshilerge qumar oıyndarǵa qatysýǵa tyıym salý. Kartanyń oflaın nemese onlaın túri de jumystan bosatýǵa ákep soǵýy múmkin. Qazirgi ýaqytta memlekettik qyzmetkerler arasyndaǵy qumar oıyndarǵa táýeldilikti anyqtaý ádistemesi ázirlengen.

Aıta ketsek, ózin qumar oıyndardan shekteýge ótinish bildirgen qazaqstandyqtar qatary kóbeıip keledi. Sondaı-aq qumar oıyndarǵa táýeldi adamdardy medıtsınalyq ońaltýdyń tártibi belgilendi.