Qazaqstandyqtar óte meıirimdi, únemi qol ushyn sozýǵa daıyn – frantsýz sportshysy Gaetan Blo

<p>ASTANA. KAZINFORM &ndash; 19 jastaǵy frantsýz Gaetan Blo dúnıejúzilik kóshpendiler oıyndarynda jamby atýdan baǵyn synap jatyr. Qazir jamby atýdan Frantsııa quramasynyń qorjynynda eki medal bar. Kóshpendiler oıyndaryna arnaıy kelgen sportshymen tildesken edik.</p>

«Dúnıejúzilik kóshpendiler oıyndaryna qatysýǵa bizdi arnaıy shaqyrdy. Frantsııa komandasy quramynda 10 adam bar, al qazir «Jamby atýǵa» 4 adam qatysyp jatyr. Jamby atýdan bólek, bizdiń sportshylar «Qazaq kúresi» men «Sadaq atýdan» baq synaıdy. Keshe jamby atý sportynyń majar stıli boıynsha 80 sportshynyń ishinen otandasymyz Rafael Malet alǵashqy altyn medaldi jeńip aldy, men qola júldege ıe boldym. Búgin jamby atýdan Azııa stıli boıynsha jarys ótip jatyr, ázirge qorytyndy nátıje belgisiz, biraq, jaqsy oıyn kórsettim dep oılaımyn. Jamby atýdy 10 jasymnan bastap oınaımyn, bul sport túri Frantsııada asa tanymal emes, biraq maǵan unaıdy», - dedi Frantsııadan kelgen jamby atýshy Gaetan Blo.

Onyń aıtýynsha, jamby atýdan Qazaqstan, Qytaı jáne Mońǵolııa komandasy – myqty qarsylastar.

«Bul meniń Qazaqstanǵa alǵashqy saparym. Maǵan unaǵany qazaqstandyqtar óte meıirimdi, únemi qol ushyn sozýǵa daıyn», - deıdi ol.

Sondaı-aq, frantsııalyq qonaq qymyzdyń dámin tatqanyn aıtty.