Qazaqstandyqtar nege óz eltańbasyn tanymaıdy
Saýalnama kezinde eldiń kóbi rámizdiń beınesin eske túsire almady. Qatysýshylardyń 70% eltańbamyzdaǵy jekelegen elementterdiń mán-maǵynasyn túsinbeıtinin aıtty.
30% ǵana alty birdeı uqsas rámiz arasynan bizdiń tól eltańbamyzdy naqtylap, tanyp kórsete aldy.
Tipti kóbiniń uqsas rámizder arasynan qanatty tulpary bar ózimizdiń eltańbamyzdy emes, qustar men aıdahar beınelengen ózge rámizderdi kórsetkeni tań qaldyrdy.
«Saýalnama barysynda otandastarymyzdan memleketimizdi adamı qasıettermen sıpattap berýin suradyq. Astana men Almaty turǵyndarynyń basym kópshiligi birdeı jaýap berdi. Qazaqstan degen — qonaqjaılyq, erkindik, otbasy qundylyqtary men birlik. Biraq kóbi osy aıtylǵan basty qundylyqtardy bizdiń qazirgi eltańbamyzdan kóre almaǵanyn atap ótti. Memleketimizdiń qazirgi eltańbasy birlik pen yntymaq shaqyryp, rámiz retinde óz mańyna shoǵyrlandyra ala ma? Saýalnama qorytyndysy qarapaıym turǵyndardyń rámiz maǵynasyn túsinbeıtinin jáne tanı almaıtynyn kórsetti. Qarapaıym halyq úshin rámiz — kitap betindegi sýret sekildi nemese mindetti túrde basshylardyń kabınetinde ilinip turýy kerek memlekettik dúnıe retinde qabyldanǵandaı, eltańbamyzdyń semıotıka nemese maǵynaǵa ıe bolmaǵany ma? Nelikten mundaı qorytyndyǵa keldik? Másele qazaqstandyqtarda ma? Álde kinárat rámizde me?» dep tolǵanady «Jańa adamdar».
Kúrdeli, eklektıkalyq maǵynadaǵy sovet úkimetinen qalǵan elementter rámizimizdiń nuryn tumshalaǵan ispetti jáne bizdi bir ult retinde shoǵyrlandyrý mindetin atqara almaı tur deıdi olar.
«Prezıdent Qasym-Jomart Toqaev jańa ádiletti Qazaqstan qurý baǵdaryn usyndy. Ol — qarapaıym halyqtyń usynystary men ótinishterin tyńdaı biletin memleketti qalyptastyrý. Osy oraıda jańa rámizimiz týraly tolǵansaq, jańarǵan jańa Qazaqstannyń jańa rámizi jahandyq kedergilerden taısalmaı ótý jolynda halqymyzdyń birligi men yntymaǵyn kúsheıteri sózsiz», — deıdi qozǵalys ókili Mádı Ómirzaqov.