Qazaqstandyqtar Lıvannan aman-esen oraldy — SІM

<p>ASTANA. KAZINFORM — 2024 jylǵy 17-31 qazan aralyǵynda Beırýttan Astana men Almaty qalalaryna 41 adam aman-esen jetkizildi. Bul týraly SІM baspasóz qyzmeti habarlady.</p>

Taıaý Shyǵys óńirindegi shıelenistiń kúsheýine baılanysty Prezıdent Qasym-Jomart Toqaevtyń tapsyrmasy boıynsha Qazaqstannyń tıisti memlekettik organdardyń qatysýymen Lıvannan Qazaqstan azamattaryn jáne olardyń otbasy múshelerin elge evakýatsııalaý sharalary júzege asyryldy.

«Atalǵan operatsııa Ystanbul jáne Dýbaı qalalary arqyly uıymdastyrylyp, nátıjesinde 2024 jylǵy 17-31 qazan aralyǵynda Beırýttan Astana men Almaty qalalaryna 41 adam aman-esen jetkizildi», — delingen SІM habarlamasynda.

Evakýatsııa áskerı qaqtyǵys aımaǵynda qalǵan Qazaqstan Respýblıkasy azamattarynyń quqyqtary men múddelerin qorǵaý maqsatynda júrgizildi.

Aıta keteıik, Prezıdent Qasym-Jomart Toqaev Qazan qalasynda ótken BRIKS-tiń plenarlyq otyrysynyń «BRIKS plıýs»/«aýtrıch» formatynda sóz sóılep, Taıaý Shyǵystaǵy ahýaldyń ýshyǵýyna alańdaýshylyq bildirdi.

Buǵan deıin Izraıl Lıvannyń ońtústiginde «Hezbolla» nysandaryna soqqy berip, 65 adam mert bolǵany habarlandy.

Sondaı-aq Izraıl Lıvannyń soltústik-shyǵysynan soqqy jasaǵany belgili boldy.

Al Izraıl táýlik ishinde Lıvannan 90 zymyran ushyrylǵanyn habarlady.