Qazaqstandyqtar kıip júrgen shulyqtyń 80 paıyzy sheteldiki – depýtat

<p>ASTANA. KAZINFORM &ndash; Májilis depýtaty Qaırat Balabıev Premer-mınıstrge joldaǵan depýtattyq saýalynda shulyq óndiretin qazaqstandyq kásiporyndardy qosylǵan qun salyǵynan bosatýdy usyndy.</p>

«Elimizde jeńil ónerkásiptiń mysyn áli kúnge ımport basyp jatyr. Buǵan memlekettik qoldaýdyń jetkiliksizdigi jáne salyqtyń joǵary júktemesi sebep. Mysaly, 2024 jylǵy esep boıynsha elimizde toqylǵan jáne trıkotaj shulyq buıymdaryn óndirýmen aınalysatyn zańdy tulǵalardyń sany 24 qana bolǵan. Onyń ishinde bir ǵana kásiporyn orta bıznes bolsa, al qalǵan 95,8%-y shaǵyn bıznestiń qatarynda. Bul rette shulyq túrleriniń 80 paıyzy shetelden ákelinedi.
Importtyq taýarlar óte arzan baǵada bolǵandyqtan, joǵary suranysqa ıe. Sol sebepti otandyq óndirýshiler ımporttyq ónimdermen básekege túse almaıdy. Importtyq ónimniń basym bóligi tómen bajdarmen ákelinedi. Buǵan Qazaq-Qytaı shekarasyndaǵy ekonomıkalyq jáne kontrabandalyq sıpattaǵy quqyq buzýshylyqtar da yqpal etedi», - dedi Májilis depýtaty.

Sondaı-aq, ol jeńil ónerkásip salasyndaǵy otandyq kásiporyndar 12% salyq tólep otyrǵanyn aıtty. 

«Munyń bári otandyq ónimniń túpkilikti baǵasy qymbatqa túsýine ákep soǵady. Elimizde óndirilgen ónim kólemin memlekettik sýbsıdııalaý kózdelmegen. Bizdiń kásipkerler úshin negizgi eksport naryǵy Reseı bolyp tur. Onda jyl saıyn 9,7 mln dollardyń ónimi jetkiziledi. Bul barlyq eksporttyń 98%-y degen sóz. 

Byltyr otandyq kásiporyndar basqa elderge 9,9 mln dollardyń 490,9 tonna shulyq ónimderin eksporttady. Bul óte tómen kórsetkish», - degen depýtat Qytaıdyń jeńil ónerkásipti qoldaý saıasatyn mysalǵa keltirdi. 

Depýtat Úkimet basshysynan shulyq óndiretin qazaqstandyq kásiporyndardy ishki naryqta alynatyn 12% qosylǵan qun salyǵynan bosatýdy surady.

«Óndirýshilerge shyǵarylatyn ónimniń salmaqtyq kólemine qaraı memlekettik sýbsıdııalar bólýdi;

Osy salada 3%-dan aspaıtyn jeńildetilgen nesıe berýdi;

Qazaqstan-Qytaı shekarasyndaǵy ekonomıkalyq jáne kontrabandalyq qylmystardy joıýdy;
Ózimizdiń kásiporyndar óndirýge daıyn jeńil ónerkásip ónimderiniń jekelegen túrleriniń ımportyna baj salyǵyn ulǵaıtýdy suraımyn», - dedi Qaırat Balabıev.