Qazaqstandyqtar qandaı jaǵdaıda kredıt tóleýden bosatylady

<p>Májilis qaraýyna engizilgen zań jobasynda kredıt alýdan aldyn ala jáne resmı túrde bas tartqan qazaqstandyqtardy alaıaqtar rásimdegen qaryzdan bosatý týraly norma qamtylǵan. Osy oraıda depýtat Berik Beısenǵalıev jańa zań jobasynda eskerilgen osy normaǵa qatysty túsinik berdi, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

«Adamdar kredıt alýǵa ótinim bermese de, onyń atyna bóten bireý nesıe rásimdep jatqan oqıǵalar kezdesip jatady. Keıin osy adam shyn máninde kredıt qarajatyn almaǵanyn dáleldep áýrege túsetin. ıAǵnı nesıe alý úshin bank ǵımaratyna da barmaǵanyn aıtyp jatady. Qazir usynylyp jatqan zań jobasynda arnaıy tarmaq engizilýde. Onyń aıasynda adamdar eGov.kz júıesi arqyly nesıe rásimdeýden aldyn ala bas tarta alady», - dedi B. Beısenǵalıev agenttik tilshisine bergen suhbatynda.

Májilis depýtatynyń sózine qaraǵanda, eger adamdar kredıtten resmı túrde bas tartsa, onda bul adam alaıaqtardyń tuzaǵyna túspeıdi.

«Naqty bir adam osy múmkindikti paıdalanyp nesıeden bas tartqanymen, keıinnen onyń atyna bireý kredıt rásimdep jatsa, onda bul adam burynǵydaı dálel aıtyp, áýre bolmaıdy. Sebebi eGov-ta osy adamnyń kredıtten bas tartqany týraly belgi turǵanyn eskerip, bank osy zańsyz rásimdelgen nesıe boıynsha mindettemeni óshiredi. Atap aıtqanda, eGov júıesinde kredıtten bas tartý týraly belgini qoısańyz, onda alaıaqtardyń sizge «ilip ketken» qaryzyna jaýap bermeısiz. Al keıinnen bankten nesıe alǵyńyz kelse, eGov-tan jańaǵy tyıym salý belgisin óshiresiz. Bul qadamdar alaıaqtar tuzaǵyna túsip qalmaý úshin kerek», - dedi depýtat.

Búgin habarlanǵanymyzdaı, Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine kredıt berý kezinde táýekelderdi barynsha azaıtý jáne qaryz alýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy engizildi.

Bul qujatta nesıeler boıynsha merzimi ótken bereshegi bolǵan jaǵdaıda azamattarǵa jańa tutynýshylyq nesıeler berýge tyıym salý, 90 kún keshiktirilgennen keıin barlyq nesıe boıynsha paıyzdardy esepteýge tyıym salý, sondaı-aq bankter men mıkroqarjy uıymdarynyń kollektorlyq agenttikterge azamattardyń nesıelerin satýyna shekteý engizý jáne taǵy da basqa normalar qarastyrylǵan.