Qazaqstandyqtar etke qansha aqsha jumsaıdy

<p>ASTANA. KAZINFORM - Bir toqsanda et jáne et ónimderin tutyný ortasha eseppen bir adamǵa 21 kelige jetti, dep jazady <a href="https://finprom.kz/" target="_blank" rel="noopener">Finprom.kz.</a></p>

Bıylǵy jyldyń úshinshi toqsanynda qazaqstandyqtardyń azyq-túlik pen alkogolsiz sýsyndarǵa jumsaǵan shyǵyny orta eseppen jan basyna shaqqanda 135,2 myń teńgeni qurady, bul 2023 jyldyń sáıkes kezeńimen salystyrǵanda (126,6 myń teńge) 6,7%-ǵa artyq.

Ásirese Almaty turǵyndary azyq-túlikke kóp aqsha jumsady: úshinshi toqsanda jan basyna shaqqanda 186,7 myń teńge – bir jyl burynǵydan 6,1%-ǵa, al respýblıkalyq kórsetkishten 38,1%-ǵa artyq. Astana ekinshi orynda (160,4 myń teńge), úshinshi orynda Shyǵys Qazaqstan oblysy (150,6 myń teńge) boldy.

Azyq-túlik pen sýsyndarǵa eń az shyǵyn Qyzylorda oblysynda belgilen: jan basyna shaqqanda 104,6 myń teńge – ótken jylmen salystyrǵanda 9,5%-ǵa kóp, biraq respýblıkalyq kórsetkishten 22,6%-ǵa az. Sektor boıynsha shyǵyny eń az úsh aımaqqa Túrkistan oblysy men Shymkent qalasy da kirdi.

Naqty azyq-túlik taýarlaryna keletin bolsaq, qazaqstandyqtardyń barlyq shyǵyndarynyń úshten bir bóligi (32,9%) et jáne et ónimderine tıesili: toqsanyna bir adamǵa 44,4 myń teńge. Bir jyl buryn bul soma 42,3 myń teńge bolatyn.

Basqa azyq-túlikterden:

nan jáne jarma ónimderi – 20,5 myń teńge;

sút ónimderi – 14,6 myń teńge;

jemister – 12,5 myń teńge;

qant, kondıterlik jáne táttiler – 9,7 myń teńge.

Qazaqstandyqtar ortasha eseppen jan basyna shaqqanda kókóniske 9,5 myń teńge, maı men toń maıǵa 7 myń teńge, balyq pen teńiz ónimderine 5,7 myń teńge, jumyrtqaǵa 2,9 myń teńge jumsaǵan. Alkogolsiz sýsyndar boıynsha shyǵyndar 6,1 myń teńgeni qurady.

Buǵan deıin jeltoqsan aıynda aýylsharýashylyq jármeńkelerine mıllıonǵa jýyq adam barǵanyn habarlaǵan bolatynbyz.

Osyǵan deıin 10 jylda alǵash ret áleýmettik mańyzy bar azyq-túlik baǵasynyń ósýi baıaýlaǵany týraly jazdyq.