Qazaqstandyqtar endi aspandaǵy shoqjuldyzdarǵa óz esimderin bere almaıdy

<p>ALMATY. KAZINFORM &mdash; Aspandaǵy juldyzdy óz atyńyzben ataý týraly usynys kópshilikti qyzyqtyrady. Buǵan halyqaralyq astronomııalyq odaq ruqsat bere me, Kazinform agenttiginiń tilshisi anyqtap kórdi.</p>

Qazir ǵalamtorda jańa juldyz ataýlaryn qosý qyzmetterin usynatyn saıttar kóp.

Bul qyzmetter Qazaqstanda da qoljetimdi. Osy jarnamalardyń birinde quny 12 500 teńgeden 250 000 teńgege deıin ózgeretin syılyq jıyntyqtary men quny 7 mıllıon teńgelik eksklıýzıvti VIP syılyq usynylǵan. Tapsyrys quny eki quramdas bóliktiń negizinde qalyptasady: syılyq jıyntyǵynyń baǵasy onyń jaryqtyǵyna baılanysty bolady.

Máselen, «Shyǵys juldyzy» syılyq jınaǵynyń baǵasy - 70 000 teńge.

Mundaı syılyqqa tapsyrys berý óte qarapaıym. Aldymen, «Juldyz satyp alý» túımesin basý kerek, sodan keıin juldyzdyń ólshemin tańdap, tirkeý úshin qajetti derekterdi toltyrasyz. Shoqjuldyzdy, juldyzdyń atyn jáne ózińizdiń tegińizdi kórsetesiz.

Osydan keıin tapsyrysty oryndaý úshin kompanııa qyzmetkeri sizge habarlasatyn bolady.

Alaıda, V.G. Fesenkov atyndaǵy astrofızıka ınstıtýty dırektorynyń orynbasary Rashıt Valıýllın, mundaı usynystar aıasynda berilgen ataýlardyń resmı nemese zańdy mártebesi joq ekenin aıtty.

Halyqaralyq astronomııalyq odaq mundaı kelisim- sharttardy moıyndamaıdy, resmı juldyzdar katalogtary obektilerdi tek sandyq ataýlarmen ǵana belgileıdi.

– Aspan denelerine ataýdy álem astronomdaryn biriktiretin halyqaralyq astronomııalyq odaq qana bere alady. Juldyzdarǵa jańa ataýlar berilmeıdi. Astronomdar ashqan kometalarǵa ǵana ataý beriledi. Juldyzdarǵa ruqsat joq. Árıne, aty joq juldyzdar bar, biraq olar sandarmen belgilenedi. Bizdiń galaktıkada mıllıardtaǵan juldyz bar jáne olardyń barlyǵyn kórý múmkin emes. Óıtkeni olardyń basym bóligi tym kúńgirt, – dep atap ótti ol.

Foto: ESO/Digitized Sky Survey 2 Acknowledgement: Davide De Martin E — Red Dots

Spıkerdiń sózinshe, qazir juldyzdardy resmı tirkeıtin zańdy kommertsııalyq agenttikter joq. Eshbir juldyzdar katalogy, observatorııa nemese ǵylymı qoǵamdastyq jeke adamdardyń juldyzdy «menshiktep» alý quqyǵyn moıyndamaıdy.

– Ǵalamtordan túrli jarnamalardy tabýǵa bolady, biraq olardyń resmı statýsy joq. Mundaı kompanııalar beretin sertıfıkattar esh mańyzy bolmaıdy. Bul oıyn-saýyqqa kóbirek uqsaıdy. Eshbir resmı juldyzdar katalogy mundaı jazbalardy moıyndamaıdy. Bul uıymdar ózderiniń katalogtaryn jasaıdy. Bul ıdeıanyń avtory Qazaqstan bolmasa da, bizdiń elde belsendi túrde júzege asyp jatyr. Bizdiń observatorııaǵa adamdar jıi ekskýrsııaǵa kelip, óz juldyzyn kórsetýdi suraıdy, biraq biz bul juldyzdyń esh jerde tirkelmegenin túsindiremiz, – dep atap ótti R. Valıýllın.

Qazir KAZINFORM agenttigi Qazaqstandaǵy jalǵyz observatorııa týraly materıal daıyndap jatyr.