Qazaqstandyqtar eńbek shartyna smartfonnan qol qoıa alady

<p>ASTANA. KAZINFORM &ndash; Endi qazaqstandyqtar jumys berýshimen eńbek shartyna tek qaǵaz túrinde ǵana emes, smartfonnan da qol qoıa alady. Jańa servıs eGov Mobile mobıldi qoldanbasynda qoljetimdi.</p>

Jumys berýshi hr.enbek.kz portalynda óziniń jeke kabınetinde elektrondyq eńbek shartynyń jobasyn jasaıdy jáne ony jumyskerge kelisýge joldaıdy.

«Jumyskerge shartqa qol qoıý usynysymen eGov Mobile mobıldi qoldanbasynda push-habarlama keledi. Ol óziniń jeke basyn qysqa parolmen, mobıldi qosymshadaǵy bıometrııalyq derektermen rastaıdy, push-habarlama arqyly ótedi. Ári qaraı eńbek shartymen tanysady, eger sharttarmen kelisse, qysqa kodty engizip nemese bıometrııalyq derektermen tekserýden ótip, óziniń ETsQ kómegimen qol qoıady», - dep jazylǵan «Ulttyq aqparattyq tehnologııalar» AQ habarlamasynda.

Júıe hr.enbek.kz portalyndaǵy jumys berýshiniń jeke kabınetine habarlama jiberedi. Jumys berýshi elektrondyq eńbek shartyna ETsQ nemese QR arqyly qol qoıady. Júıe qol qoıylǵan elektrondyq eńbek shartyn avtomatty túrde Eńbek sharttaryn esepke alýdyń biryńǵaı júıesine tirkeýge jiberedi, sodan keıin shart jasalǵan bop esepteledi. Servıs iske qosylǵan sátten bastap, 775 elektrondy eńbek shartyna qol qoıylǵan.

Eger paıdalanýshy mobıldi qoldanbany ornatpasa, biraq mobıldi azamattar bazasynda tirkelgen bolsa, oǵan qoldanbany júkteýge silteme, jańa habarlamanyń kelip túskeni týraly aqparaty bar 1414 nómirinen sms-habarlama jiberiledi. Qoldanbaǵa eń alǵash kirgen kezde paıdalanýshyǵa jiberilgen barlyq habarlamalar shyǵyp turady.