Qazaqstandyqtar dıplomdaryn eGov.kz portalynda tsıfrlandyra alady
eGov.kz portalynda bilim týraly qujattardy tsıfrlandyrýǵa arnalǵan qyzmet qoljetimdi. Endi azamattar tek qate derekterdi túzetip qana qoımaı, qujattyń tsıfrlyq nusqasyn jasaýǵa ótinish bere alady. Qyzmet tek buryn alynǵan dıplomnyń nemese attestattyń skanerlengen kóshirmesi bolǵan jaǵdaıda ǵana qoljetimdi.
«Bilim týraly qujattardaǵy málimetterdi jańartý (túzetý)» memlekettik qyzmeti keńeıtildi. Buryn bul qyzmet tek qate málimetterdi túzetýge múmkindik berse, endi bilim týraly qujattardy tsıfrlandyrýǵa ótinish berý múmkindigi qosyldy.
Qyzmetti paıdalaný úshin:
— eGov.kz portalynda avtorızatsııadan ótip, «Azamattarǵa» — «Bilim» bólimin tańdaý kerek;
— «Bilim týraly qujattardaǵy málimetterdi ózektendirý (túzetý)» qyzmetin tańdap, «Onlaın suraý» batyrmasyn basý qajet;
— «Bilim týraly qujattar týraly aqparatty tsıfrlandyrý» qyzmetin tańdap, bilim týraly qujattyń túrin kórsetip, qujattyń skanerlengen kóshirmesin tirkeý kerek;
— qyzmettiń nátıjesi paıdalanýshynyń jeke kabınetinde «Qyzmetterdi alý tarıhy» bóliminde qoljetimdi bolady.
— Qujattardy tsıfrlandyrý kezeń-kezeńmen júzege asyrylady. Qazirgi ýaqytta 1980 jyldan 2023 jylǵa deıin berilgen orta bilim, tehnıkalyq jáne kásibı bilim berý qujattary tsıfrlandyrýǵa jatady. Qyzmetti kórsetý ýaqyty — 5 jumys kúnin quraıdy. Qyzmet kórsetýden bas tartý usynylǵan qujattar nemese derekter qate bolǵan jaǵdaıda múmkin, — delingen habarlamada.
Qyzmettiń jańartylǵan fýnktsıonaly QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik kórsetiletin qyzmetter komıteti, «Ulttyq aqparattyq tehnologııalar» AQ, QR Oqý-aǵartý mınıstrligi jáne «Ahmet Baıtursynuly atyndaǵy „Taldaý“ ulttyq zertteýler jáne bilimdi baǵalaý ortalyǵy» AQ-nyń birlesken jumysynyń nátıjesinde iske qosyldy.
Buǵan deıin habarlaǵanymyzdaı, byltyr qazaqstandyqtar eGov arqyly 44 mln qyzmet alǵan.