Qazaqstandyqtar 1 synypqa qabyldaýǵa 240 myńnan astam ótinim berdi

<p>ASTANA. KAZINFORM &ndash; Bıyl 1 sáýirde bastalǵan birinshi synypqa ótinimder men qujattar qabyldaý 31 tamyzǵa deıin jalǵasady, dep habarlaıdy QR Oqý-aǵartý mınıstrliginiń baspasóz qyzmeti.</p>

Ata-ana balalarynyń qujattaryn egov.kz elektrondy úkimetiniń veb-portaly arqyly bere alady. Jalpy jańa oqý jylynda birinshi synypqa 370 myńnan astam qazaqstandyq bala barady dep kútilýde.

«Búgingi tańda 242 myńnan astam ótinim kelip tústi. Birinshi synypqa qabyldaý boıynsha eń kóp ótinim Túrkistan, Almaty, Qyzylorda oblystarynda, sondaı-aq Almaty, Astana qalalarynda tirkelip otyr», - dep habarlady QR Oqý-aǵartý mınıstrligi Orta bilim berý komıteti.

Esterińizge sala keteıik, azamattarǵa qolaıly bolýy úshin, bul qyzmet túri avtomattandyrylyp, qujattardy qabyldaý egov.kz veb-portaly arqyly júrgizilýde. Birinshi synypqa balalar alty jastan bastap, ata-anasynyń nemese zańdy ókiliniń ótinishi negizinde qabyldanady.

Portal arqyly usynylatyn qujattar:

1) Ata-anasynyń nemese zańdy ókildiń ótinishi;

2) 065/e nysanyndaǵy «Profılaktıkalyq ekpeler kartasy» jáne №052-2/e nysanyndaǵy «Bala densaýlyǵy kartasy» medıtsınalyq qujattary;

3) Balanyń 3h4 sm kólemindegi tsıfrlyq fotosýreti.

Ótinishter demalys jáne mereke kúnderin qospaǵanda, dúısenbiden jumaǵa deıin qabyldanady.