Qazaqstandyq úsh tennısshi Ýımbldon týrnıri irikteý kezeńiniń jartylaı fınalyna ótti
Álemniń 163-raketkasy Denıs Evseev reıtıngide ózinen 8 saty tómen turǵan frantsııalyq Matteo Martınony qapy qaldyrdy.
Eki saǵat 20 mınýtqa sozylǵan kezdesýde D.Evseev kambek jasaı aldy – 6:7 (4:7), 6:2, 7:6 (10:7). Ol 11 eıspen birge 7 breık-poınttyń beseýin paıdalandy. Martıno 9 eıs, 3 breıkpen (11 breık-poınt) kózge tústi.
Reıtıngide 208-orynda turǵan Beıbit Juqaev erledi deýge bolady. Ol álemniń 154-raketkasy, aýstralııalyq ıÝrıı Rodıonovty jarys jolynan taıdyrdy – 7:6 (7:5), 7:6 (9:7).
Bir saǵat 55 mınýtqa sozylǵan báseke barysynda Beıbit eıs sanyn 21-ge jetkizip, 3 breık-poınttyń bireýin óz esebine jazdy. Rodıonov 3 eıs, 1 breıkten (5 breık-poınt) asa alǵan joq.
Taǵy bir qazaqstandyq, reıtıngide 229-satydaǵy Tımofeı Skatov álemniń 158-raketkasy, ıtalııalyq Andrea Pellegrınony eki sette jeńdi – 6:3, 6:3. Saǵat jarymǵa jýyq ýaqytqa sozylǵan oıynda ol 4 eıspen birge 8 breık-poınttyń úsheýin dittegen jerine jetkizdi. Pellegrıno 3 eıspen ǵana shekteldi.
Osylaısha, irikteý saıystarynyń jartylaı fınalynda D.Evseev álemniń 133-raketkasy, frantsııalyq Tıtýan Drogetpen, T.Skatov reıtıngide 129-satydaǵy slovakııalyq Lýkash Kleınmen synǵa túsedi. B.Juqaevtyń qarsylasy keıin anyqtalady. Al M.Kýkýshkın álemniń 152-raketkasy, taǵy bir frantsııalyq Bendjamın Bonzımen kezdesetin boldy.
Eske sala keteıik, budan buryn Mıhaıl Kýkýshkınniń Ýımbldon týrnıriniń irikteý saıysyn sátti bastaǵanyn jazǵan bolatynbyz. Sondaı-aq qazaqstandyq tennısshi Ispanııadaǵy jarystyń 1/8 fınalyna shyqty.