Qazaqstandyq tennısshiler Ýımbldon týrnırinde jeńilissiz keledi

<p>LONDON. KAZINFORM &ndash; Qazaqstandyqtar Beıbit Juqaev, Tımofeı Skatov jáne Zarına Dııas Ýımbldon týrnıri irikteý saıystarynyń fınalyna ótti.</p>

Dúnıejúzilik reıtıngide 208-orynda turǵan Beıbit Juqaev álemniń 127-raketkasy, serbııalyq Hamad Medjedovıchti jarys jolynan taıdyrdy.

Qazaqstandyq tennısshi birinshi sette 6:7 (3:7) ese jibergenimen, kambek jasaı bildi – 7:5, 6:4. Eki saǵat 21 mınýtqa sozylǵan tartysty matchta Beıbit eıs sanyn 27-ge jetkizip, 4 breık-poınttyń teń jartysyn múlt jibergen joq. Medjedovıch 25 eıspen kózge tústi.

Taǵy bir qazaqstandyq, álemniń 229-raketkasy Tımofeı Skatov reıtıngide ózinen 100 saty joǵary turǵan slovakııalyq Lýkas Kleındi qapy qaldyrdy – 7:6 (10:8), 7:6 (7:5). Eki saǵat 17 mınýttyq báseke barysynda Skatov 3, Kleın 10 eıspen erekshelendi. 

Іrikteý saıystarynyń fınalynda Beıbit Juqaev álemniń 223-raketkasy, frantsııalyq Kenten Galımen, Tımofeı Skatov reıtıngide 111-oryndaǵy Chılı ókili Krıstıan Garınmen sheberlik baıqasady. 

Áıelder arasynda reıtıngide 967-oryndaǵy Zarına Dııas sensatsııa jasap, álemniń 138-raketkasy, amerıkalyq Sachııa Vıkerıdi jeńip ketti – 3:6, 7:5, 7:5. Eki saǵat 15 mınýttan turǵan oıynda Zarına 2 eıspen birge 10 breık-poınttyń jeteýin paıdalandy. Vıkerı 6 eıs, 7 breıkti (13 breık-poınt) óz esebine jazdy.

Zarına Dııas irikteý kezeńiniń fınalynda álemniń 92-raketkasy, qytaılyq Chjosıýan Baı nemese reıtıngide 194-satydaǵy taılandtyq Lanlana Tararýdıdiń qaı jeńgenimen talasady.

Ýımbldonnyń irikteý jarysynyń fınalyna súrinbeı jetken qazaqstandyqtar kelesi qarsylastaryn jeńse, negizgi týrnırge joldama alady.

Qazaqstannyń erler arasynda birinshi, álemniń 23-raketkasy Aleksandr Býblık Istbýrn (Ulybrıtanııa) ATP 250 týrnıriniń ekinshi aınalymynda kútpegen jerde reıtıngide 81-oryndaǵy aýstralııalyq Aleksandar Výkıchten 4:6, 4:6 esebimen jeńilip, shırek fınalǵa shyǵa almaı qaldy.

Sonymen qatar reıtıngide 58-orynda turǵan Aleksandr Shevchenko Malorka (Ispanııa) ATP 250 dodasynyń ekinshi aınalymynda chılılik, álemniń 24-raketkasy Alehandro Tabılodan jeńilis tapty – 3:6, 2:6. 

Eske sala keteıik, budan buryn Zarına Dııastyń Ýımbldon týrnıriniń irikteý saıysyn jeńispen bastaǵanyn jazǵan bolatynbyz. Sondaı-aq Ýımbldonda Kýkýshkın men Evseev irikteý saıystarynyń fınalyna shyqty.