Qazaqstandyq tennısshiler Týnıs pen Portýgalııadaǵy jarysty sátti bastady

<p>ASTANA. KAZINFORM &ndash; Qazaqstandyq, álemniń 247-raketkasy Tımofeı Skatov Týnıstegi chellendjer týrnıriniń irikteý saıysyn sátti bastady.</p>

T.Skatov irikteý saıystarynyń jartylaı fınalynda dúnıejúzilik reıtıngide 487-orynda turǵan ońtústikkoreıalyq Kvon Sýn Výdy 6:4, 6:3 esebimen tize búktirdi.

Tımofeı Skatov irikteý saıystarynyń fınalynda reıtıngide 405-satydaǵy nıderlandylyq Maks Haýkesti utsa, negizgi týrnırge joldama alady. 

Atalmysh dodanyń júlde qory 82 myń AQSh dollaryna baǵalanǵan. Onyń jeńimpazy 11 200 dollarǵa qosa 75 reıtıngilik upaıǵa ıe bolady. 

Taǵy bir qazaqstandyq, álemniń 223-raketkasy Dmıtrıı Popko Oeırash (Portýgalııa) chellendjer týrnıriniń irikteý saıysynda reıtıngide 641-satydaǵy kort ıesi Pedro Araýhony 7:5, 3:6, 6:4 esebimen utty. Úsh saǵatqa jýyq ýaqytqa sozylǵan tartysty báseke barysynda Popko 16 breık-poınttyń altaýyn paıdalandy.

Dmıtrıı Popko irikteý saıystarynyń fınalynda álemniń 285-raketkasy, lıtvalyq Vılıýs Gaýbastan ótse, ol da negizgi jarysqa qosylady. 

Osy týrnırde álemniń 174-raketkasy Beıbit Juqaev ta óner kórsetedi. Onyń alǵashqy aınalymdaǵy qarsylasy – reıtıngide 282-oryndaǵy belgııalyq Gote Onklın. 
Eki jarys ta 19 mamyrda máresine jetedi.

Eske sala keteıik, budan buryn Aleksandr Býblıktiń juptyq synda Rım masters týrnıriniń shırek fınalyna shyqqanyn jazǵan bolatynbyz.

A.Býblık amerıkalyq Ben Sheltonmen birge jartylaı fınalǵa shyǵý úshin argentınalyqtar Frantsısko Serýndolo – Tomas Martın Etcheverrımen talasady.