ASTANA. KAZINFORM – Qazaqstandyq tennısshi Grıgorıı Lomakın juptyq synda Monastır (Týnıs) ITF týrnırinde top jardy. Jarystyń 1-raketkalary G.Lomakın men reseılik Ilıa Sımakın barlyǵy tórt kezdesý ótkizdi.
Qazaqstandyq-reseılik jup jartylaı fınalda amerıkalyq Djordan Chıý – úndistandyq Rohan Mehrany 6:0, 6:3 esebimen oısyrata jeńdi.
Fınalda Lomakın – Sımakın jarystyń 4-raketkalary, portýgalııalyqtar Pedro Araýho - Hose-Lýıs Markesti 6:1, 7:5 esebimen utyp, jeńis tuǵyryna kóterildi.
Taǵy bir qazaqstandyq, reıtıngide 244-oryndaǵy Dmıtrıı Popko jekeleı synda Vıchentsa (Italııa) chellendjer dodasynda álemniń 134-inshi, jarystyń 1-raketkasy, kort ıesi Franchesko Passaroǵa 2 saǵattan astam ýaqytqa sozylǵan tartysty matchta jol berdi – 3:6, 6:3, 4:6. Sóıtip ol jartylaı fınaldan tys qaldy.
Sondaı-aq Jibek Qulambaeva juptyq synda reseılik Ekaterına Reıngoldpen birge Breshııa (Italııa) ITF W75 týrnıriniń fınalynda ıspanııalyq Ivon Kavale-Reımers – ıtalııalyq Avrora Zantedeshıden jeńilip qaldy – 6:3, 5:7, 6:10. Bul oıyn 1 saǵat 38 mınýtqa sozyldy.
Eske sala keteıik, budan buryn Jibek Qulambaevanyń Italııadaǵy týrnırdiń fınalyna shyqqanyn jazǵan edik. Al, Rolan Garros týrnırinde Elena Rybakına 1/8 fınalǵa ótti.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).