Qazaqstandyq taýarlar óndirisin lokalızatsııalaý – QazMunaıGazdyń strategııalyq mindeti — Ashat Hasenov

<p>AQTAÝ. KAZINFORM&nbsp; - Aqtaý qalasynda 15 qazanda jergilikti qamtýdy qoldaýǵa baǵyttalǵan &laquo;QazMunaıGaz&raquo; UK AQ jobalaryndaǵy bızneske arnalǵan múmkindikter&raquo; atty forým ótti. Іs-sharaǵa Qazaqstannyń barlyq óńirinen 100-den astam otandyq taýar óndirýshi qatysty.</p>

«QazMunaıGaz» UK AQ (QMG) Basqarma tóraǵasy Ashat Hasenov óz sózinde munaı-gaz salasyndaǵy jergilikti óndiristerdi yntalandyrýdyń mańyzyn atap ótti. QazMunaıGazdyń iri jobalaryna otandyq óndirýshilerdiń qatysýy el ekonomıkasynyń damýynda sheshýshi ról atqaryp, jańa jumys oryndaryn ashýǵa jáne naryqta qazaqstandyq ónimniń básekege qabiletti bolýyn arttyrýǵa yqpal etedi. 

Foto: «QazMunaıGaz» UK AQ baspasóz qyzmeti

«Qazaqstandyq qamtý úlesin ulǵaıtý jáne taýarlar óndirisin lokalızatsııalaý – bul negizgi basymdyq qana emes, sonymen qatar strategııalyq mindet. Bul máselege QazMunaıGaz erekshe nazar aýdaryp keledi. Otandyq óndirýshiler ımportpen básekelesip qana qoımaı, munaı-gaz jobalary úshin tıimdiligi joǵary sheshimder usyna alatyndaı deńgeıde bolýyna jaǵdaı jasap jatyrmyz», - dedi A.Hasenov.

Foto: «QazMunaıGaz» UK AQ baspasóz qyzmeti

Jyl basynan beri QazMunaıGaz kompanııalar toby 350 mlrd teńgeden asa somaǵa taýar satyp aldy. Sonyń 250 mlrd teńgeden astamy otandyq óndirýshilerdiń ónimin satyp alýǵa jumsaldy. Bul jalpy taýar satyp alý kóleminiń 72%-y.

Bıznes forým alańynda qazaqstandyq óndirýshiler ózderi shyǵaratyn transformator, kabel, hımııa, munaı óndirý ónimderiniń túrlerin usyndy. QMG enshiles kásiporyndarynyń ókilderi óz kezeginde óndiriste paıdalanylatyn ımporttyq jabdyqtar men taýarlardyń otandyq ónimmen tolyǵymen ne ishinara aýystyrýǵa bolatyn úlgilerin kórsetti.

Munaıshylar áleýetti seriktesterge Qazaqstan Respýblıkasynyń aýmaǵynda jergilikti óndiris úshin 334 mlrd teńgege, Jańaózende 20 mlrd teńgege eseptelgen jobalar usyndy. 

Budan bólek bıznesmenderge munaı óndirý salasyndaǵy jabdyqtardy jóndeý jáne olarǵa qyzmet kórsetý boıynsha munaı servıs ortalyqtaryn ashý usynyldy. Sonymen qatar iri munaı-gaz jobalaryna («Qalamqas-teńiz, Hazar ken oryndaryn ıgerý», «Polıetılen óndiretin keshen» jáne «Gaz bólý keshenin salý») arnalǵan qajetti taýarlar men qyzmetter týraly aqparat berildi. 

Foto: «QazMunaıGaz» UK AQ baspasóz qyzmeti

Forým qorytyndysy boıynsha QazMunaıGazdyń enshiles kásiporyndary otandyq óndirýshilermen ofteık-kelisimsharttar jasasty.

Atap aıtqanda, «Embimunaıgaz» AQ men «Atyrau Oil Service» JShS arasynda 1 mlrd teńgeden astam somaǵa munaı jabdyqtaryn (tereńdiktegi qarnaqty sorǵynyń jelilik jetek júıeleri) jasap shyǵarý jóninde, «Pavlodar munaı-hımııa zaýyty» JShS men «INTERTRANS C.A» JShS arasynda 51 mlrd teńgeden astam somaǵa alkılat (benzınge arnalǵan joǵary oktandy qospa) óndirý jóninde ofteık-kelisimshart qabyldandy.

Budan basqa «Ózenmunaıgaz» AQ, Munaıly aýdanynyń ákimdigi jáne «KazPetroDrilling» AQ («Qaskor-Mashzavod» JShS) arasynda Mańǵystaý oblysynda bolat quıý óndirisin ashý týraly memorandýmǵa qol qoıyldy. Qujattyń maqsaty – munaı uńǵymalaryna arnalǵan jabdyqtardy shyǵarý kezinde jergilikti qamtý úlesin arttyrý.

Aıta ketsek, 2024 jyldyń basynan beri QazMunaıGaz otandyq óndirýshilermen jalpy 58 mlrd teńgeden astam somaǵa 107 ofteık-kelisimshart jasasty. Jyl sońyna deıin olardyń jalpy úlesi 55%-ǵa jetedi dep josparlanǵan.

Іs-shara otandyq taýar óndirýshilerdi qoldaý jáne damytý aıasynda «Samuryq-Qazyna» qorynyń qoldaýymen jáne «Samuryq-Qazyna Kontrakt» JShS-men birlesip ótkizildi.