Qazaqstandyq Seýldegi jaǵdaı týraly: bári turaqty

<p>ASTANA. KAZINFORM &ndash; Qazaqstandyq Dmıtrıı Lı Ońtústik Koreıada 6 jyl turyp jatyr. Seýldegi jerlesimiz el astanasyndaǵy jaǵdaıdyń turaqtalǵanyn jetkizdi.</p>

— Qazir jaǵdaı turaqty. Áskerıler joq, ázirge bári qalypty, bári bitti. Áskerıler sol kúni ketip qaldy, olar el prezıdenti áskerı jaǵdaı jarııalaǵan kezde ǵana boldy. Sol kúni, keshki saǵat 22:00–de birqatar koreılik tanymal adamdar áleýmettik jelide mańyzdy kezdesýlerden bas tartýǵa májbúr bolǵanyn aıtyp shaǵymdandy. Sonymen qatar, Qazaqstan men Ońtústik Koreıa memleketi Qorǵanys mınıstrleriniń kezdesýi toqtatyldy. Degenmen, kelesi kúni tańerteń balalar mektepke, eresekter jumysqa bardy. Barlyǵy bir túnde bolyp, sol túni aıaqtaldy. Barlyǵy Úkimet deńgeıinde sheshildi, — dedi Dmıtrıı Lı.

Sondaı-aq, jerlesimiz koreı halqynyń beıbit jınalysy áli de jalǵasyp jatqanyn aıtyp otyr.

— Beıbit jıyndar jyl boıy jalǵasyp keledi. Buqaralyq aqparat quraldary asa nazar aýdarǵan joq, óıtkeni, koreı halqy beıbit jıynǵa jıi shyǵady. Qarsylyq ár aptada senbi saıyn ótedi. Sońǵy derek 100 myńǵa jetti, kóptegen adam prezıdentke qarsy boldy. Óıtkeni, ol Koreıadaǵy eń tanymal emes prezıdentterdiń biri, — deıdi ol.

Aıta ketsek, 3 jeltoqsanda Ońtústik Koreıa prezıdenti ıÝn Sok El elde áskerı jaǵdaı engiziletinin habarlaǵannan keıin saıası aýhal shıelenisken bolatyn. 

Osyǵan oraı Koreıadaǵy Qazaqstan elshiligi qazaqstandyqtarǵa úndeý jasady. 

Artynsha Koreıa parlamenti elde áskerı jaǵdaı rejımin alyp tastaýdy talap etti.  Sodan soń Ońtústik Koreıa prezıdenti eldegi áskerı jaǵdaıdy alyp tastaıtyny belgili boldy. 

Kazinform tilshisi Ońtústik Koreıa prezıdentiniń nar táýekelge barý sebebine sholý jasaǵan edi. 

Aıta ketsek, búgin Qazaqstan men Ońtústik Koreıa Qorǵanys mınıstrleriniń kelissózi ótpeıtini aıtyldy.

Sondaı-aq Ońtústik Koreıa prezıdentine ımpıchment jarııalaý protsesi bastaldy.