Qazaqstandyq pedagogter men oqýshylar jasandy ıntellektini meńgeredi

<p>ASTANA. KAZINFORM - Qazaqstandyq pedagogter men oqýshylar jasandy ıntellektti qoldaný jáne baǵdarlamalaý daǵdylaryn meńgeretin boldy, dep habarlaıdy QR Oqý-aǵartý mınıstrliginiń baspasóz qyzmeti.&nbsp;&nbsp;</p>

Memleket basshysynyń tapsyrmasy boıynsha QR Oqý-aǵartý mınıstrligi TsDIAÓM, «Astana hub» halyqaralyq tehnoparkimen jáne «Órleý» BAUO AQ-men birlesip oqýshylar men pedagogterge arnalǵan baǵdarlamalaý negizderin oqytatyn onlaın-bilim berý platformasynyń pılottyq jobasyn iske qosty.

Bastapqy kezeńinde 300 muǵalim men trener «Jasandy ıntellekt» jáne Game Development baǵyttary boıynsha biliktiligin arttyrýda. Bıyl 31 jeltoqsanda aıaqtalatyn kýrstar alty aıǵa josparlanǵan. Kýrs aıaqtalǵan soń árbir qatysýshyǵa sertıfıkat beriledi, olar ári qaraı oqýshylar men pedagogterdi baǵdarlamalaý negizderine oqyta alady.

«Pılottyq mektepterdiń bilim alýshylary baǵdarlamalaý negizderi boıynsha bıyl shilde-jeltoqsan aralyǵynda onlaın rejımde «No Code», «Low Code» jáne «Startup Academy» kýrstarynan jáne oflaın 2025 jyldyń qańtarynan bastap baǵdarlamalaý negizderi boıynsha oqıdy. Qazir Astana Hub platformasynda bilim alýshylardy onlaın tirkeý júrip jatyr. Ár oqýshyǵa qupııa sóz ben logın beriledi, onyń kómegimen olar modýlderdi ıgerip, tapsyrmalardy oryndap, testileýden óte alady. Barlyq modýlderden sátti ótken bilim alýshylarǵa kýrsty aıaqtaǵany týraly sertıfıkat beriledi, bul IT-ónimderdi jasaýǵa múmkindik beretin bolady», – dep atap ótti Orta bilim berý komıtetiniń basqarma basshysy Gúlnar Talasbaeva.

Aıta ketý kerek, oqýshylar ózderine yńǵaıly ýaqytta oqı alady. Ár sabaqta beınedáris, qosymsha materıaldar jáne test tapsyrmalary bar. Sondaı-aq qatysýshylar pılottyq joba úılestirýshilerinen kómek suraı alady. Pılottyq joba barlyǵy 27 myńnan astam oqýshyny qamtıdy.