Qazaqstandyq oqýshylar robototehnıkadan úsh dúrkin álem chempıony atandy

<p>ASTANA. KAZINFORM - Grekııada robototehnıkadan eń iri chempıonat FIRST Global Challenge óz máresine jetti. Qazaqstandyq oqýshylar birneshe baǵyt boıynsha kósh bastap qana qoımaı, 190 eldiń arasynan basty júldeni jeńip alyp, rekordtyq nátıjege qol jetkizdi.</p>

Bul týraly QR Oqý-aǵartý mınıstrliginiń baspasóz qyzmetinen habarlandy.

Baspasóz qyzmetiniń habarlaýynysha, Qazaqstan quramasy úshinshi jyl qatarynan óziniń chempıon ekenin dáleldep keledi. Komandanyń quramyna Almaty qalasynyń FMB NZM-niń oqýshylary: Erdáýlet Túrgenbaev, Álfııa Baıjaqyp, Nurjan Kókeev, Dosjan Daıran jáne Qadylbek Dastan endi. Jattyqtyrýshylary - Nurdáýlet Dosmaǵambet pen Dýlat Baıtýlenov.

Foto: QR Oqý-aǵartý mınıstrliginiń bapasóz qyzmeti

Grand Challenge Award nomınatsııasy boıynsha altyn medal men oıyndardaǵy rekordtyq upaı sanynan basqa, qazaqstandyq quramanyń júlde qory joǵarǵy tóreshiler nomınatsııasynda eki kúmis medalmen tolyqty: A.Eınshteın atyndaǵy FIRST Global International Excellence jáne úzdik ınjenerlik ázirlemeler úshin Robots Skills Challenge. Budan basqa Ál-Horezmı atyndaǵy Outstanding Supporter nomrnatsııasynda kúmis medalmen otandyq USTEM FOUNDATION jas ınjenerlerge kórsetken qoldaýy úshin marapattaldy.

«Biz jarysta top jaryp, elimizdiń júlde qorjynyn altyn medalmen tolyqtyrdyq jáne rekordqa qol jetkizdik. Álemniń birde bir eli eki dúrkin chempıon bola almady, al bizdiń balalarymyz úshinshi jyl qatarynan jeńis tuǵyrynan kórindi. Aıta ketý kerek, komanda quramy osy jyldarda qaıtalanǵan emes, elimizdiń namysyn qorǵaýǵa ár jarysqa únemi jańa oıynshy attanyp otyrady, olar saıystyń ulttyq kezeńinde irikteledi», - deıdi qordyń negizin qalaýshy jáne quramanyń jattyqtyrýshysy Asylbek Murzahmetov.

Foto: QR Oqý-aǵartý mınıstrliginiń baspasóz qyzmeti

Esterińizge sala keteıik, Qazaqstan 2022 jyly Jenevada, 2023 jyly Sıngapýrde jeńiske jetken bolatyn. Ulttyq qurama Oqý-aǵartý mınıstrliginiń, «Daryn» RǴPO-nyń, Almaty qalasy ákimdiginiń qoldaýymen ótken robototehnıkadan irikteý kezeńderinde quryldy.

Anyqtama úshin: FIRST Global Challenge - bul olımpıada úlgisindegi robototehnıkadan búkilálemdik chempıonat. Ol jyl saıyn túrli elde ótkizilip otyrady. Bul bedeldi ınjenerlik dodadaǵy qazaqstandyq oqýshylardyń úshinshi jeńisi.