Qazaqstandyq oqýshylar Ózbekstandaǵy matematıka olımpıadasynda baq synaýda

<p>TAShKENT. KAZINFORM &ndash; Ózbekstan astanasynda &laquo;FEMO&raquo; VI halyqaralyq olımpıadasynyń fınaldyq kezeńi ótip jatyr. Bul saıysty Qazaqstannyń respýblıkalyq fızıka-matematıka mektebi uıymdastyrǵan, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a> agenttiginiń Tashkenttegi menshikti tilshisi Álıhan Asqar.</p>

Olımpıadada elimizben qatar, Ózbekstan, Qyrǵyzstan, Reseı, Tájikstan, Grýzııa jáne Túrkııadan kelgen 340 bala baq synaýda. Saıystyń irikteý kezeńderi buǵan deıin Astana men Almatyda ótken. Sheshýshi syndy Tashkentte uıymdastyrýǵa osy eldegi qazaqstandyq dıplomattar uıytqy bolǵan.

«Fınalǵa 400-ge jýyq bala ótkenimen, saıysqa 340 adam qatysyp otyr. Barlyǵy ata-anasymen kelgen. Bul rette ıntellektýaldy týrızmniń damyp jatqanyn baıqaýǵa bolady», - dedi Respýblıkalyq fızıka-matematıka mektebi basqarma tóraǵasynyń orynbasary Almas Kúnǵojın.

Bilim báıgesi aýqymdy kólemde uıymdastyrylǵan. Maqsaty – balalardyń matematıkaǵa degen qyzyǵýshylyǵyn damytý ári el kórip, jer tanýyna jaǵdaı jasaý. Olımpıadanyń ashylý saltanatyna Qazaqstannyń Ózbekstandaǵy elshisi Beıbit Atamqulov qatysyp, órenderge sáttilik tiledi.

«Biz Shymkent qalasynan kelip qatysyp otyrmyz. Tashkentke 3 bala alyp keldim. Qazirgi tańda oqýshylarym respýblıkalyq deńgeıdegi olımpıadalarda chempıon atanyp júr», - dep málim etti qazaqstandyq muǵalim Máýlen Mehkam.

Fınal eki kezeńnen turady. Atap aıtqanda, oqýshylar jeke jáne toptyq synda sheberlik baıqasady.