Qazaqstandyq qyzdarǵa APV-ǵa qarsy amerıkalyq vaktsına salynady

<p>ASTANA. KAZINFORM &ndash; Qyrkúıek aıynda 11 jastaǵy qyz balalardy Adamnyń papılloma vırýsyna qarsy vaktsınalaý bastalady. Bul týraly QR DSM Sanıtarlyq-epıdemıologııalyq baqylaý komıteti tóraǵasynyń orynbasary Záýre Ahmetova aıtyp berdi.</p>

Ekpege APV-nyń barynsha onkogendi túrlerinen qorǵaıtyn «Merk Sharp jáne Doým» (AQSh) kompanııasy shyǵarǵan 4 valentti «Gardasıl» vaktsınasy qoldanylady.

«APV-ǵa qarsy vaktsınatsııa onkologııalyq aýrýlardyń, sonyń ishinde jatyr moıny obyrynyń aýyrtpalyǵyn azaıtýǵa múmkindik beredi jáne jalpy halyqtyń densaýlyq kórsetkishterin jaqsartýǵa jáne onkologııalyq aýrýlardan bolatyn syrqattanýshylyq pen ólim-jitimdi tómendetýge yqpal etedi», - dedi Z. Ahmetova Ortalyq kommýnıkatsııalar qyzmetinde.

Spıkerdiń aıtýynsha, Qazaqstanda jatyr moıny obyry barlyq jastaǵy áıelder arasynda sút bezi obyrynan keıingi ekinshi orynda tur jáne fertıldi jastaǵy (25-44 jas) áıelder ólimi boıynsha ekinshi orynda tur.

«Elimizde jyl saıyn jatyr moıny obyrynyń 1900-ge jýyq jańa jaǵdaıy tirkeledi, jyl saıyn 600-den astam áıel osy patologııadan qaıtys bolady. Búgingi tańda papılloma vırýsyn juqtyrýdyń jáne jatyr moıny obyrynyń damýynyń aldyn alýdyń jalǵyz joly – vaktsınalaý», - dedi spıker.

Syrqattyń aýyrtpalyǵyn jáne APV-ǵa qarsy vaktsınatsııalaýdyń tıimdiligin eskere otyryp, 135 memleket, onyń ishinde Ózbekstan, Qyrǵyzstan, Tájikstan, Túrikmenstan bul vaktsınany ózderiniń ulttyq ımmýndaý baǵdarlamalaryna engizgen.