Qazaqstandyq kásipkerler Bloomberg, Google jáne Meta keńsesinde boldy
31 mamyr men 11 maýsym aralyǵynda qazaqstandyq bıznesmender AQSh-pen ekonomıkalyq yntymaqtastyq ornatý maqsatynda Nıý-Iork, Vashıngton jáne Kalıfornııanyń Sılıkon alqabyndaǵy mańyzdy iskerlik ortalyqtardy aralaý múmkindigine ıe boldy.
Qazaqstandyq bıznes-qoǵamdastyqtyń ókilderi Dúnıejúzilik bank, BUU, HVQ, Halyqaralyq qarjy korporatsııasy (IFC), Bloomberg, JPMorgan Chase, sondaı-aq jetekshi tehnologııalyq kompanııalar – Google, META jáne Tesla sııaqty mekemelerdegi joǵary deńgeıdegi kezdesýlerge qatysty.
«Parasat» bıznes klýby músheleriniń qatysýymen Vashıngtondaǵy Dúnıejúzilik bank ǵımaratynda AQSh bıznesi ókilderiniń qatysýymen «Keńeıtý kókjıekteri: AQSh-Qazaqstan ekonomıkalyq yntymaqtastyǵy bolashaǵy» taqyrybynda birinshi bıznes-forým ótti.
AQSh-taǵy QR elshiliginde «Parasat» bıznes klýbynyń ókilderi QR AQSh-taǵy elshisi Erjan Ashyqbaevpen jáne Soltústik Amerıkanyń qazaqstandyq mádenı jáne isker qaýymdastyǵynyń dırektory Aınur Rodjerspen jeke kezdesý ótkizdi. Taraptar naýryz aıynda Almatyda ótken «V5+1» bastamasynyń tabysty damýynyń bir bóligi retinde AQSh-taǵy qazaqstandyq bıznestiń damý perspektıvalaryna jáne amerıkalyq naryqty zertteýge qatysty máselelerdi talqylady.
Astana halyqaralyq ýnıversıtetiniń prezıdenti Serik Irsalıev otandyq oqý ornynyń AQSh, Reseı jáne Qytaıdyń birqatar úzdik ýnıversıtetimen tyǵyz áriptestik baılanysy bar ekenin atap ótti. Astana halyqaralyq ýnıversıtetinde Garvard ýnıversıtetiniń (AQSh) úlgisi boıynsha táýelsiz jáne turaqty menedjment júıesin qurý josparlanýda. Onda bitirýshiler bes jylda bir ret basqarý organynyń múshelerin saılaıdy. Al, ol óz kezeginde Garvard ýnıversıtetiniń prezıdentin taǵaıyndaıdy.
– Tek akademııalyq emes, analıtıkalyq seriktester izdep, ýnıversıtetimizdiń doktoranttaryn analıtıkaǵa daıyndaý maqsatynda birneshe amerıkalyq analıtıkalyq ortalyqty araladyq. Osy alańda jarqyn ıdeıalar men durys sheshimder týyndaıdy dep senemiz», - dedi Serik Irsalıev.
«QM Meta media agency» negizin qalaýshy Abylaıhan Kamaladın mundaı kezdesýlerdi AQSh-ta ótkizýge múmkindik bergeni úshin uıymdastyrýshylarǵa alǵysyn bildirdi.
– Vashıngtonda ótken birneshe kúnde men kóp nársege qol jetkize alatynymyzdy túsindim. Qazirdiń ózinde yntymaqtastyqty bastaýǵa múmkindik bar. Elge paıdasy tıer deńgeıge ótýge jol ashyq, - dep bólisti Abylaıhan Kamaladın.
«Parasat» bıznes-klýbynyń bas dırektory Dıana Dostanova «Parasat» bes qalada ókildik etetinin aıtty: Astana, Almaty, Shymkent, Qaraǵandy jáne Oral. Negizgi mıssııa – jańa halyqaralyq naryqtarǵa shyǵa alatyn jańa bıznes elıtany damytý.
Dıana Dostanovanyń aıtýynsha, bul – amerıkalyq ekonomıkamen jáne kompanııalarmen tanysýdyń birinshi sapary ǵana. Keıin eki el arasynda qýatty saýda jáne mádenı baılanystar ornatylatynyna senim mol.
Soltústik Amerıkanyń qazaqstandyq mádenı jáne isker qaýymdastyǵynyń dırektory Aınur Rodjers «KCBANA» kommertsııalyq emes úkimettik emes uıymy Vashıngtonda (Kolýmbııa okrýgi) ornalasqanyn jáne qazaqstandyq bıznesti Birikken Ulttar Uıymynda ilgeriletý úshin jeke sektorda tıimdi ekonomıkalyq yntymaqtastyqty damytyp jatqanyn aıtty.
– AQSh iskerlik týry Qazaqstan men AQSh arasyndaǵy ekijaqty baılanysty nyǵaıtýdaǵy mańyzdy kezeń sanalady. Bizdiń mindetimiz – qazaqstandyq kásipkerlerge AQSh-ta bilim men baılanystar berý, ınvestıtsııalyq múmkindikterdi yntalandyrý jáne ártúrli sektorlardaǵy seriktestikti nyǵaıtý», - dedi Aınur Rodjers.
Qaýymdastyq Qazaqstannyń AQSh-taǵy ımıdjin kóterý maqsatynda mádenı is-sharalar ótkizedi. Osylaısha, 2023 jyldyń qazan aıynda Qazaqstan Respýblıkasy kúnine arnalǵan birinshi Ortalyq Azııa kınofestıvali aıasynda qazaq kınosynyń aptalyǵy ótti.
– Halyqaralyq festıvalderde qazaq mádenıetin tanytyp, Qazaqstannyń ımıdjin AQSh-ta nasıhattaýǵa tyrysamyz. Biz amerıkandyqtardyń Qazaqstandy shyǵarmashylyq áleýeti zor daryndy halyqtyń beınesimen baılanystyrǵanyn qalaımyz», - dedi Aınur Rodjers.
Aldaǵy ýaqytta birqatar joba áleýmettik salaǵa – balalarǵa, jetim balalarǵa, kásipker áıelderge jáne erekshe qajettilikteri bar adamdarǵa baǵyttalǵan. Atap aıtqanda, KCBANA tájirıbe almasý maqsatynda AQSh pen Qazaqstan dárigerlerimen almasýdy, sondaı-aq amerıkalyq hırýrgtardyń Qazaqstanda birneshe tegin jaq-bet otalaryn jasaýdy josparlap otyr.
«Parasat» bıznes-klýbynyń ókili, «Ulan-ǵaıyr dala eli» qoǵamdyq birlestiginiń dırektory, Qazaqstan halqy Assambleıasynyń múshesi, jastar qozǵalysynyń jetekshisi, saıasattanýshy Ýálıhan Bahretdınov bul sapardan úlken áser alǵanyn atap ótti. Pandemııaǵa baılanysty uzaq úzilisten keıin AQSh-pen ekonomıkalyq jáne kólik-logıstıkalyq baılanystardy qalpyna keltirý qajet. Qarjylyq múmkindikterden bólek, qazaqstandyq bıznesmender eń damyǵan elden mol tájirıbe aldy.
– Osy aptada AQSh-ta qazaqstandyq bıznesmender yntymaqtastyqty odan ári damytýǵa septigin tıgizetin birqatar nátıjeli kezdesý ótkizdi. Bıznesmender V5+1 bastamasyn quptaıdy jáne ony der kezinde qolǵa alynǵanyn durys dep esepteıdi. Bul – eki eldiń geografııalyq turǵydan alystaý bolǵanyna qaramastan Ortalyq Azııany Amerıka Qurama Shtattaryna anaǵurlym jaqyn etedi, - dedi Ýálıhan Bahretdınov.
Otandasymyzdyń aıtýynsha, amerıkalyq bıznes elimizdi zerttep jatyr, al, Qazaqstan yntymaqtastyqqa joǵary qyzyǵýshylyq tanytyp otyr.
«Kazakh Invest» ulttyq kompanııasynyń Soltústik Amerıkadaǵy sheteldik ókili Marat Birimjan Vashıngtonda ótken bıznes-forýmda kóptegen qazaqstandyq jáne amerıkalyq kompanııanyń, Dúnıejúzilik banktiń, Halyqaralyq valıýta qorynyń jáne basqa da uıymdardyń ókilderi bolǵanyn atap ótti. Sonyń ishinde USAID bar.
Onyń aıtýynsha, forým aıasynda Qazaqstan ekonomıkasynyń shıkizattyq emes sektoryna, mashına jasaý, aýyl sharýashylyǵy, kólik-logıstıka, týrızm, densaýlyq saqtaý, bilim berý jáne t.b. salalarǵa ınvestıtsııa tartý boıynsha jobalar talqylandy.
«Men qazirgi zamanǵy joǵary tehnologııalary bar iri jáne orta amerıkalyq kompanııalardyń bizdiń naryqqa shyǵyp, Qazaqstan ekonomıkasyna ınvestıtsııa salyp, elimizde óndiristi lokalızatsııalaýyn qalaımyn», - deıdi Marat Birimjan.
AQSh ekonomıkasy men naryǵynyń úlkendigi sonsha, olardyń tájirıbesi men tehnologııalary Qazaqstan ekonomıkasynyń barlyq salasyn qyzyqtyratynyn atap ótken jón.