Qazaqstandyq gir kóterýshiler halyqaralyq jarysta top jardy

<p>ASTANA. KAZINFORM &mdash; Qazaqstannyń gir kóterýshilerine &laquo;Báıterek&raquo; holdıngi qoldaý kórsetip, sportshylarymyz álem chempıonatynda júldeli oryndarǵa ıe boldy. 21-26 tamyz aralyǵynda Qyrǵyzstan Respýblıkasy Cholpon-Ata qalasynda gir kóterý sporty boıynsha álem chempıonaty ótti. Jarys 21 elden 600-den astam qatysýshyny jınap, olardyń ishinde qazaqstandyq sportshylar úzdik nátıjeler kórsetti.</p>

«Biz sportshylarymyzdy qoldaǵany úshin «Báıterek» holdıngine shyn júrekten alǵysymyzdy bildiremiz. Osy kómektiń arqasynda biz Qazaqstandy halyqaralyq arenada laıyqty túrde kórsete aldyq, bul bizdi ári qaraı elimizdegi gır kóterý sport túrin damytyp qana qoımaı, jańa jeńisterdi baǵyndyrýǵa shabyttandyrady», - dep atap ótti komanda jattyqtyrýshysy Marat Moldybaev.

Foto: «Báıterek» holdıngi

Aıta keteıik, «Báıterek» holdıngi Soltústik Qazaqstan oblysy, Ýálıhanov aýdanynan habarlasqan sportshylardyń ótinishine beı-jaı qaramaı, halyqaralyq jarysqa baryp qatysýyna qajetti joly men jatyn oryndarynyń shyǵyndaryna qoldaý kórsetken bolatyn.

Foto: «Báıterek» holdıngi

Nátıje súıinshili bolyp, Jaqsylyq Islıamov «uzyn tsıkl» jattyǵýynda 68 kg deıingi (U18) salmaq dárejesinde birinshi orynǵa ıe boldy.

Foto: «Báıterek» holdıngi

Meıram Bekejan «ıterý» jattyǵýynda 73 kg deıingi (U23) sanat boıynsha kúmis júldeger atandy. Qyzdar arasynda Mahabbat Mýsaıbekova «ıterý» jattyǵýynda 58 kg deıingi (U16) salmaq dárejesinde qola júldege ıe boldy. Sport ardageri Halıt Súleımenov (60-64 jas) Reseı men Anglııadan kelgen sportshylardan keıin qurmetti úshinshi orynǵa ıe boldy.

«Biz kez kelgen sportshyny maqtan tutamyz jáne el namysy synǵa túsetin baıraqty básekelerde esemiz ketpegenin qalaımyz. Osy joly shalǵaı aýdannan shyǵyp halyqaralyq jarysqa qatysamyz degen azamattarǵa aq jol tilep edik, osyndaı joǵary nátıjelerge qol jetkizgenderin estip qýandyq. Gir sporty olımpıadalyq sport túrine jatpasa da, sportshylarymyz júldeli oryndarǵa ıe boldy. Bul, elimizde sport tek iri qalalarda ǵana emes, sonymen qatar aýylda da damyp jatqanynyń belgisi. Bundaı bastamalar sportty barlyq deńgeıde qoldaýdyń qanshalyqty mańyzdy ekenin kórsetedi», - dep atap ótti «Báıterek» UBH» AQ Basqarma tóraǵasy Rýstam Karagoıshın.

«Báıterek» UBH» AQ aldaǵy ýaqytta da áleýmettik máselelerdi sheshýge jáne oń qoǵamdyq qabyldaýdy qalyptastyrýǵa yqpal etetin bastamalardy qoldaıtyn bolady.