Qazaqstandyq ǵalymdar Horizon Europe grantyna ótinim bere alady

<p>ASTANA. KAZINFORM &ndash; Elordada Nazarbaev ýnıversıtetinde Qazaqstan turaqty damý sheshimderi jelisiniń (SDSN) ekinshi konferentsııasy ótip jatyr.</p>

Onda qazaqstandyq ǵalymdarǵa Eýropalyq Odaqtyń klımattyń ózgerýine qarsy kúreske baǵyttalǵan zertteýler men ınnovatsııalardy qarjylandyrý jónindegi Horizon Europe granttyq baǵdarlamasy tanystyryldy.

Eýropalyq komıssııanyń ǵylymı-zertteý jáne ınnovatsııalar jónindegi bas dırektsııasynyń ókili Kremena Mıleva Horizon Europe baǵdarlamasy qazaqstandyq ǵalymdar men zertteý uıymdary úshin ashyq ekenin jetkizdi.

«Baǵdarlamanyń jalpy bıýdjeti shamamen 100 mıllıard eýrony quraıdy jáne 7 jylǵa eseptelgen. Qazir baǵdarlama aralyq kezeńde tur jáne 2027 jylǵa deıin jalǵasady. Qazaqstandyq ǵalymdardyń kelesi úsh kezeńge daıyndalýǵa jáne qatysýǵa ýaqyty bar. Árıne, biz qazaqstandyqtardyń bul baǵdarlamaǵa kóbirek qatysqanyn qalaımyz», - dedi K. Mıleva Nazarbaev ýnıversıtetinde ótken SDSN konferentsııasynda.

Ǵylym jáne joǵary bilim mınıstrliginiń «Ǵylym qory» AQ «Horizon Europe» baǵdarlamasynyń ulttyq úılestirýshisi atandy.

Foto: Soltan Jeksenbekov/Kazinform

«Qazaqstannyń ǵalymdary men ǵylymı uıymdaryna baǵdarlamaǵa qatysýǵa eshqandaı shekteý joq. Kez kelgen adam qujattardy tapsyra alady. Ǵylym qory óz tarapynan osy baǵytta úlken jumys júrgizýde. Aldyńǵy jyly jáne bıyl bizde birqatar vorkshoptar ótti. Búgin de baǵdarlamaǵa qatysýdyń negizgi aspektileri túsindiriledi: ótinimdi qalaı berý kerek, qarjylandyrý parametrleri, erekshelikteri, EO-men seriktestermen yntymaqtastyq jaıy talqylanady. Bul qazaqstandyq zertteýshiler úshin orasan zor múmkindikter ashady», - dedi «Ǵylym qory» AQ Basqarma tóraǵasy Kamıl Aqatov.

Onyń aıtýynsha, birqatar otandyq ǵalym Horizon Europe baǵdarlamasyna ótinim berip úlgerdi.

Aıta keteıik, 13-14 mamyr kúnderi konferentsııada Belgııa, Nıderlandy, Germanııa, Qazaqstan, Qyrǵyzstan jáne Ózbekstannyń sarapshylary men ǵalymdary eki kún ishinde bilim berý, qoǵamdyq densaýlyq saqtaý, energetıka, memlekettik basqarý, úkimettik emes sektor sııaqty salalarda 2030 jylǵa deıingi turaqty damý salasyndaǵy ulttyq jáne óńirlik deńgeıdegi kún tártibin oryndaý quraly retinde lokalızatsııalaý máselesin talqylaıdy.