Qazaqstandyq desantshylar Gımalaıdy baǵyndyrdy
Teńiz deńgeıinen 3200 metr bıiktik, aınala – taý kórinisteri, arqada – parashıýt, qarý-jaraq pen jabdyqtar, maqsat – jaýyngerlik tapsyrmany oryndaý. Osylaısha, qazaqstandyq desantshylar kásibı biliktilikteri men jaýyngerlik daıyndyqtaryn kórsetip otyr.
Qazaqstan Respýblıkasy Qarýly kúshteri Desanttyq-shabýyldaý áskerleriniń parashıýtshiler toby «QazÚndi-2024» oqý-jattyǵýynda tapsyrmalardy áskerı kontıngent quramynda oryndady. Olardyń ishinde eki qyz – parashıýtshi-nusqaýshy efreıtor Baljan Musataeva men 61993 áskerı bólimi materıaldyq-tehnıkalyq qamtamasyz etý vzvodynyń sanıtarlyq nusqaýshysy efreıtor Marjan Saıranova da bar.
Bıik taýdaǵy kúrdeli ahýalda qyzdar shekteýli alańǵa parashıýtpen sekirip dál qoný arqyly jaqsy nátıje kórsetti.
– Dál sekirý – ádette teńiz deńgeıinen 1200-den 4000 metrge deıingi bıiktikten, jeke jáne toptasqan túrde, ártúrli tómendetý rejımderinde berik jáne basqarylatyn deńgeıleri bar «qanat» túrindegi arnaıy parashıýt júıesi arqyly oryndalady. Dál sekirý basqarylatyn parashıýttermen birge paıda bolǵan eń kóne parashıýt sportynyń biri bolsa da, ol eń kúrdelisi, óıtkeni parashıýt júıeleri jańartylǵan saıyn alańnyń ólshemderi men ruqsat etilgen normalar ózgeredi. Efreıtor Musataeva ekeýmiz týra shektelgen alańnyń ortasyna qonamyz, – dedi efreıtor Marjan Saıranova.
Efreıtor Baljan Musataeva túrli parashıýt júıelerimen júzden asa sekiripti. Jýyrda ǵana baǵdarlamany aıaqtaǵannan keıin ol parashıýtshi-nusqaýshy ataǵyn aldy. Marjan Saıranova parashıýtpen sekirýdi endi bastaǵan. Bul onyń alǵashqy halyqaralyq jattyǵýy, degenmen parashıýt komandasynyń aǵa ofıtseri podpolkovnık Erjan Tólepulynyń aıtýynsha, Marjan qysqa ýaqytta jaqsy nátıje kórsetip júr.
Esterińizge sala keteıik, «QazÚndi – 2024» oqý-jattyǵýy 30 qyrkúıek pen 13 qazan aralyǵynda Úndistannyń soltústik bóligi Aýlı qalasynyń mańyndaǵy «Sýrıa» oqý-jattyǵý ortalyǵynda ótkizilip jatyr. Namysty dodaǵa Qurlyq áskerlerinen «Ońtústik» óńirlik qolbasshylyǵy men QR Qarýly kúshteriniń Desanttyq-shabýyldaý áskerleri áskerı qyzmetshileriniń quramynan jasaqtalǵan rota qatysyp jatyr.
Oqý-jattyǵý barysynda eki kontıngenttiń áskerı qyzmetshileri taý daıyndyǵy tájirıbesimen bólisip, terrorızmge qarsy qaýipsizdik boıynsha birlesken mindetterdi oryndaıdy. Desant túsirý kezinde Qazaqstan Desanttyq-shabýyldaý áskerleriniń áskerı qyzmetshileri Úndi áriptesterimen birlesip, kúrdeli taýly jerlerde parashıýtpen sekirý jattyǵýlaryn oryndaǵan.