Qazaqstandyq boksshylar Lıtvadaǵy halyqaralyq týrnırde 6 altyn jeńip aldy

<p>ASTANA. KAZINFORM &mdash; Lıtvanyń Kaýnas qalasynda bokstan Algırdas Shotsıkas atyndaǵy halyqaralyq týrnırde Qazaqstan quramasy tabysty óner kórsetti.</p>

Fınalda 9 qazaqstandyq boksshy sharshy alańǵa shyqsa, sonyń altaýy altyn medal jeńip aldy.

Atap aıtqanda, 57 kelige deıingi salmaqta Asyljan Serikbaı ýkraınalyq Denıs Rozdolskıdi eki ret nokdaýnǵa jiberip, aıqyn basymdylyqpen utty.

Irlandııalyq Paýl Heıl Djon jekpe-jekten bas tartqandyqtan, Jandos Qydyrálıev (63,5 kg) taǵy bir altynǵa qol jetkizdi.

Qorǵanysta saýatty qımyldap, shabýylda shıraqtyq tanytqan Elnur Súıinbaı (67 kg) Polsha ókili Kırıll Globenkodan aılasyn asyrdy.

Farýh Toqtasynov (71 kg) sońǵy básekesin de qarqyndy ótkizip, ýkraınalyq Maksım Molodanǵa esh múmkindik bergen joq.

Azamat Bektas (75 kg) polıak Mıhal ıArlınskıdiń álsiz tusyn tapsa, Tursynbaı Qulahmet (80 kg) aǵylshyn Ramtın Mýsadan bir bas joǵary ekendigin kórsetti.

Al Nursultan Altynbek (54 kg) sońǵy aıqasta ýkraınalyq Ivan Zavadskııge, Almat Ábdýálı (60 kg) latvııalyq Matveıs Prokýdınske, Abzal Quttybekov (86 kg) aǵylshyn Isaak Ohoǵa tóreshiler sheshimimen jol berdi.

Osylaısha, qazaqstandyq boksshylar atalmysh jarysta 6 altyn, 3 kúmis, 2 qola júldege ıe boldy. Buǵan deıin Danııal Sábıt (51 kg) pen Amanat Sabyrǵalı (+92 kg) qolamen shektelgen edi.

Eske sala keteıik, budan buryn toǵyz boksshymyzdyń Lıtvadaǵy halyqaralyq týrnırdiń fınalyna shyqqanyn jazǵan bolatynbyz.