Qazaqstandyq boksshylar Ammandaǵy Azııa birinshiligine qatysady

<p><strong>ASTANA. KAZINFORM &ndash; Bokstan Qazaqstan quramasy Iordanııanyń Amman qalasynda ótetin Azııa chempıonatyna qatysady. Bul týraly Ulttyq olımpıada komıteti habarlady.&nbsp;&nbsp;</strong></p>

Bul týraly bas bapker Qaırat Sátjanov málimdedi. 

«Olımpıada oıyndary aıaqtalǵan soń, bokstan eresekter komandasy qandaı da bir jarysqa qatysqan joq. Aldaǵy ýaqytta Qaraqozy Ábdálıevti eske alýǵa arnalǵan iri halyqaralyq báseke ótedi. Atalǵan týrnır 29 qyrkúıek pen 5 qazan aralyǵyna josparlanǵan. Bul dodada ulttyq qurama sportshylarynyń barlyǵy da baq synap kóredi.

Bir aıta keterligi, halyqaralyq týrnırge Túrkııa, Ózbekstan, Tájikstan syndy memleketterden sportshylar keledi. Osy týrnır ulttyq qurama boksshylary úshin aldaǵy Azııa birinshiligine irikteý bolatynyn eske salamyn.

Azııa chempıonaty 30 qarasha men 12 jeltoqsan aralyǵynda Iordanııanyń Amman qalasynda ótedi. Qazir barlyq sportshyny baqylaıtynymyzdy aıtqym keledi. Azııa birinshiligine qatysatyn keıbir salmaqtardaǵy sportshylar osy Qaraqozy Ábdálıev týrnırinen soń anyqtalady. 80 kelide Olımpıadanyń kúmis júldegeri Nurbek Oralbaı qatysady dep otyrmyz. Qalǵan boksshylar osy jarystan soń belgili bolady», - dedi bas bapker.

Eske sala keteıik, buǵan deıin Qytaıdyń Makao qalasynda ýshýdan X Azııa chempıonaty máresine jetkenin, otandastarymyz 2 altyn, 1 kúmis, 4 qola medal jeńip alǵanyn jazǵan edik.