ASTANA. KAZINFORM – Tıranada (Albanııa) 23 jasqa deıingi jastar arasynda áıelder kúresinen ótken álem chempıonatyn qazaqstandyqtar júldesiz aıaqtady.
25 qazan kúni batysqazaqstandyq Zeınep Baıanova 53 kelige deıingi salmaqta júldege birtaban jaqyn boldy.
Zeınep jubanysh beldesýinde shvetsııalyq Ellen Ostmandy 5:1 esebimen utyp, qola júlde úshin talasýǵa múmkindik aldy.
Qola júlde úshin básekede mońǵolııalyq Otgontýıa Chınbold birinshi kezeńde 2:0 esebimen alǵa ketti. Ekinshi kezeńde esepti 12:2-ge jetkizip, beldesýdi merziminen buryn aıaqtady. Osylaısha, Z.Baıanova besinshi oryndy qanaǵat tutty.
Sondaı-aq 24 qazan kúni qola medalǵa talasqan Laýra Ǵanıqyzy (50 kg) japonııalyq Ýmı Itodan, al Alına Ertóstik (76 kg) Kúnshyǵys eliniń taǵy bir ókili Nodoka ıAmamotodan utylyp qalǵan bolatyn.
Eske sala keteıik, budan buryn qazaqstandyq qos balýannyń álem chempıonatynyń qola júldesi úshin kúresetinin jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).