ORAL. KAZINFORM — Albanııa astanasy Tıranada grek-rım kúresinen 67 keli salmaqta óner kórsetken Meıirjan Shermahanbet Muhamet Malo reıtıngilik týrnırinde jeńimpaz atandy. Qazaqstandyq balýan jarysty iri jeńispen bastap, alǵashqy beldesýinde ekvadorlyq Andres Arroıony 9:0 esebimen utty.
Kelesi kezeńde ázirbaıjandyq Mahammad Shýkýrzadeni 4:0 esebimen jeńip, jartylaı fınalǵa ótti.
Jartylaı fınalda grýzııalyq Djonı Hetsýrıanıden 3:1 esebimen basym tústi.
Fınaldyq beldesýde Meıirjan taǵy bir grýzııalyq Dıego Chhıkvadzeni 5:1 esebimen tize búktirdi.
Osylaısha, 2018 jyly álem chempıonatynda qola alyp, 2022 jyly Azııa oıyndarynyń kúmis júldegeri atanǵan Meıirjan Shermahanbet Tıranadaǵy reıtıngilik týrnırde úzdik shyqty.
Taǵy bir qazaqstandyq Ernur Fıdahmetov 63 keli salmaqta qola júldege ıe boldy. Ol úshinshi oryn úshin beldesýde ırandyq Alı Nýraıden 6:3 esebimen aılasyn asyrdy.
Eske sala keteıik, budan buryn Qazaqstannyń áıelder quramasy Muhamet Malo týrnırinde birinshi oryn alǵanyn jazǵan edik.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).