Qazaqstandyq AES-te apat bolǵan jaǵdaıda kim jaýapty bolady

<p>ASTANA. KAZINFORM &ndash; Energetıka mınıstrligi atom energetıkasy jáne ónerkásip departamenti dırektorynyń orynbasary Gúlmıra Mursalova elimizde atom elektr stantsııasyn salý boıynsha Astanada ótken qoǵamdyq tyńdaý barysynda bolashaqta qazaqstandyq atom stantsııasynda apat bolǵan jaǵdaıda kim jaýapty bolatynyn aıtty.</p>

Onyń aıtýynsha, apat jáne ıadrolyq zalaldyń yqtımal jaǵdaıynda azamattyq-quqyqtyq jaýapkershilik týraly Vena konventsııasy aıasynda qadaǵalanady. 

Eń aldymen, ony paıdalanýmen aınalysqan atom stantsııasynyń operatory jazalanady. Sodan keıin lıtsenzııa bergen tıisti qadaǵalaý baqylaý organy. Memlekettiń ózi jáne tehnologııa jetkizýshisi de jaýapty. Sońǵysy ónimderiniń qaýipsizdigine kepildik berýi tıis. 

Ulttyq ıadrolyq ortalyqtyń bas dırektory Erlan Batyrbekov áriptesin qoldap, apat yqtımaldyǵy tym tómen ekenin túsindirdi. 

«Qaýipsizdik týraly aıtatyn bolsaq, atom stantsııalary bir-birin tolyqtyratyn belsendi jáne passıvti qaýipsizdik júıelerimen jabdyqtalǵan. Reaktordyń qalypty jumysynan shamaly aýytqýdyń bastapqy kezeńinde de keri baılanys bar, ol tabıǵat zańdaryn qoldana otyryp, ony qalpyna keltiredi», - deıdi E. Batyrbekov. 

Buǵan deıin sala mamany atom elektr stantsııasynan kómirqyshqyl gaz shyǵaryndylaryna qatysty pikir bildirgen edi. 

Búgin Astanada elimizde atom elektr stantsııasyn salý máselesi boıynsha qoǵamdyq tyńdaý ótti.